حضن عشماوي الجزء السادس عشر للكاتبة..حنان حسن تكونش اميرة تبقي راجل مش واحدة ست؟ و هي المسؤالة عن الحمل ؟... وعن الجنين الي في ...
الجزء السادس عشر
للكاتبة..حنان حسن
تكونش اميرة تبقي راجل مش واحدة ست؟
و هي المسؤالة عن الحمل ؟...
وعن الجنين الي في بطني؟
وانا معرفش
مهو مفيش تبرير للجنان الي بيحصل دا غير كده
اصل ازاي اميرة بتعترف انها
(هي جعفر)؟
وازاي بتدعي انها انتحلت شخصية جعفر؟
اذا كان جعفر كان بعتلي رسالة
بيقولي فيها انه ابو الجنين الي في بطني؟
ولية اميرة كانت عايزاني احافظ علي الجنين؟
ومصلحتها ايه في كده؟
دي الاسألة الي سالتها لاميرة
اثناء ما كانت بتسردلي
حقيقة جعفر
ولما اميرة شافت حيرتي
فا ردت اميرة علي سؤالي
وقالتلي...انا اتعمدت اني اوهمك بان جعفر هو ابو الجنين الي في بطنك لاكتر من سبب
اولهم...هو اني اخليكي تفكري في الاجهاض
لان من البديهي انك بمجرد ما هتعرفي ان الحمل من جعفر
اكيد كنتي هتفكري انك تخلصي من الجنين
وانا كنت عايزاكي تجهضي
لاني مكنتش عايزة وريث لمحمد
والسبب التاني
هو اني اقوي نفوذي عليكي من خلال جعفر
عشان اقدر امسك عليكي ذلة..
واجبرك انك تق&تلي محمد..
وكنت بسعي بكل السبل...اني اخلص من محمد...
ومن ابنة الي في بطنك
عشان ميبقاش لهم حق في الميراث
في اللحظة دي
وقفت اميرة تاني
وقولتلها...
وطبعا كنتي ناوية بعدما تخلصي من محمد وابنة
هتخلصي عليا انا كمان؟
ها كملي
فا بصتلي اميرة بمكر ممزوج بالغل
بدون ما ترد علي سؤالي
وكملت في روايتها
وقالتلي...
بعدما اتفقت مع (بديل جعفر)
ونجح في المهمة الاولي
وقتل سعيد عامر
بدات بعدها اتصل بيكي واكلمك بواسطة برنامج بيغير الاصوات
ومن خلال الصوت المفلتر
طلبت منك انك تقتلي محمد وتحرقي الفيلا بالي فيها
وطبعا انا كنت عاملة حسابي اني ههرب من الفيلا
اول ما الاقيكي بتنفذي الاوامر
وبتولعي البيت
في اللحظة دي
بصتلها بغيظ
وقلتلها..
يخربيت دماغك الي مليانة تعابين دي يا شيخة
ها كملي...
وفعلا كملت اميرة
وقالت..
في الاول الامور كانت ماشية تمام
وانتي كنتي بتنفذي الاوامر بحذافيرها
لغاية ما في يوم
لقيتك بترفضي انك تنفذي اي امر ليا
وشعرت ساعتها ان ورقة الضغط الي كنت ماسكاها عليكي وانا منتحلة شخصيةجعفر ضاعت..
وخصوصا لما قولتي لجعفر ان امك ماتت
ولما لقيت شخصية جعفر
فقدت سيطرتها عليكي
قررت اتعامل معاكي بنفسي
وبشخصيتي الحقيقية
ووهمتك باني كنت واقفة في الغرفة طول الوقت و سمعت المكالمة الي بينك وبين جعفر وسجلتها كمان
وبدات اطلب منك بنفسي انك تقتلي محمد
وهنا وقفت اميرة عن السرد
وسالتها..
وقلت..لكن انا فاكرة انك سجلتي فعلا المكالمة
وانا بنفسي مسحتها؟
فا ردت اميرة عليا ببساطة
وقالتلي..انتي ناسية اني مهكرة الموبيل بتاعك؟
يعني
كل مكالماتك كانت متسجلة عندي بالفعل
فا رديت وانا بلعنها
وقلتلها...ماشي
كملي
فا كملت اميرة
وقالت ..
بعدما حاولت اني اجبرك انك تقتلي محمد
كنت فاكرة اني خلاص قدرت احقق اهم اهدافي
لكن...انتي خدعتيني ووضعتي لمحمد المخدر بدل السم
فا رجعت افكر اني استعين ببديل جعفر تاني..
عشان هو الي يضغط عليكي ويجبرك انك تقتلي محمد
وعملت خطة
عن طريق الموبيل برضوا
واتصلت بالهجام الي عرفك علي نفسة بانة هو جعفر
وسهلت له دخولة للبيت
واتفقت مع جعفر المزيف علي انه يتسلل لغرفتك..اول ما اتصل بيه
لان في الوقت دا
انا كنت عارفة ان محمد بره البيت
ومن خلال الموبيل
امرت جعفر انه يجبرك علي التصويب علي محمد
ودا بالنسبالي كان مهم
لان محمد لو اتقتل بايدك
كنت هبقي خلصت منكم انتوا الاتنين
فا قاطعت بغيظ
وسالتها
وقلت..هو انتي ايه الي كان مخليكي واثقة اوي باني هعرف اصيب محمد؟
مش يمكن انا لو كنت وافقت علي مبدء القتل و اخطأت الهدف...
كان امرك اتفضح انتي والهجام بتاعك؟
فا ردت اميرة بثبات
وقالتلي..
لا منا كنت اصدرت اوامري لبديل جعفر
وقلتلة..
لو ملك معرفتش تصيب الهدف يكمل هو المهمة ويصيبة من بعيد
وبعدما ينفذ المهمة الاولي ويقتل محمد.......
ينفذ المهمة الاخيرة و.......
ولما لقيت اميرة مترددة انها تكمل روايتها وخطتها البشعة
اتكلمت انا
وقلت..وقفتي سرد لية
ما تكملي ؟
فا كملت اميرة بالفعل
وقالت...
باقي الخطة كان مفروض ان بديل جعفر بعدما هيجبرك علي قتل محمد..
هيقتلك انتي كمان بنفس المسدس
الي علية بصماتك
عشان تبان عملية القتل علي انك قتلتي زوجك وانتحرتي بعدها
لكن ...الي حصل
ان بديل جعفر طلع شخص غبي..
وحاول يجود من دماغة
وبدل ما ينفذ الي قولتلة علية
حب يقضي سهرة ممتعة معاكي الاول
وكانت النتيجة
انه بدل ما يقتلك انتي الي قتلتية
في اللحظة دي
قعدت علي الكرسي الي في غرفة اميرة
وشعرت ببعض الارتياح
بعدما اتفكت بعض الطلاسم
الي مكنتش فاهماها
لكن رجعت تاني اسأل اميرة
وقلتلها..
واية حكاية الساعتين الي طلبتي مني البسهم انا ومحمد
ولية كنتي حاطة فيهم كاميرات
فا ردت اميرة
وقالت...الساعات مكنش فيهم كاميرات
الساعات كان فيهم طوابع مخدرة
بمجرد ما بتلبسوا الساعات بيشتغل مفعول المخدر
و انا ساعتها فكرت اني اصورك في اوضاع مخلة مع محمد عشان اضغط عليكي بالصور دي
وعشان اوصل للهدف ده
كان لازم تبقوا تحت تاثير المخدرات
فا اتصرفت وجيبتلكم الساعات اياها
في اللحظة دي كنت عايزة اقتلها
و انتفضت وسالتها
قلت...وفين الصور دي دلوقتي
فا ردت اميرة ببرود
وقالت...معرفش... انا صورتها فعلا
لكن فجاءة ملقتهاش علي الموبيل
قلت..مش مصدقاكي
اعترفي فين الصور
فا ردت اميرة
وقالتلي ..انا مقدرش اكدب في اي حاجة بقولهالك
لاني لوكدبت هو هيعرف وهيعاقبني
ولما سمعت هذيانها
سكت وفضلت ابصلها
لكن بعدها فكرت شوية
ورجعت...
سالتها تاني
وقلت ..
ولية شغلتيلي فضايحك علي الشاشة ولية استدرجتيني عشان اشوفها؟
فا بصتلي اميرة بتعجب
وسألتني
وقالتلي ..تقصدي ايه بفضايحي دي؟
فا رديت عليها بغيظ
وقلت...
الفيديوا المنيل الي شغلتية علي الشاشة
هو انتي كنتي حابة علاقتك القذرة بسعيد اوي كده لدرجة انك تسجليها علي فلاشة؟
وتفرجيني عليها كمان؟
فا بصتلي اميرة بنفس النظرة المليئة بالتعجب
وقالتلي...فلاشة اية ؟وفضايح اية؟ انا مش فاهمة حاجة؟
وفي اللحظة دي
شكيت انها تكون صادقة فعلا ومتعرفش حاجة عن الفيديوا الاباحي بتاعها
ودا في حد ذاتة مصيبة تانية
لان دا معناه
ان في شخص تاني هو الي شغلي الفيديوا
وبدل ما اسألها تاني
واقولها...امال مين الي شغلي الفيديوا
سالتها سؤال اهم
وقلتلها..
ممكن اعرف انتي خبيتي ماما فين؟
فا ردت اميرة وهي بتهز اكتافها
وقالتلي...معرفش حاجة عن امك
وبعدين انتي مش قولتي ان امك ماتت؟
فسالتها تاني
وقلت...انا عارفة انك
انتي الي لقيتي الموبيل بتاعتي
واخدتية يا اميرة
... صح؟
فردت اميرة عليا بسؤال
وقالتلي..
هو الموبيل بتاعك ضايع؟
قلت...يعني عايزة تفهميني ان الموبيل بتاعي مش معاكي
قالت...لا طبعا الموبيل بتاعك مش معايا
ومعرفش انه ضاع منك اصلا
فا بصتلها بشك
وقلتلها...لا كده بقي انتي رجعتي تحوري
طب ليه هترجعي تصيعي عليا تاني يا اميرة؟
ما كنتي بتعترفي بالحقيقة وماشية كويس...
وانا كنت مصدقاكي؟
فا ردت اميرة بحده
وهي بتشاور بايدها ليا عشان اسكت ...لغاية ما تسمع الهاتف الي بيكلمها
وكأنها بتسمع كلام محدش غيرها سامعة
وبعدما انتهت من الاستماع
فضلت تكلم الهواء
وتقول...
متقولها اني نفذت اوامرك واعترفتلها بالحقيقة كلها ...
ومخبتش عنها اي حاجة
ورجعت اميرة تبصلي وهي بتترجاني
وتقولي...
ارجوكي يا ملك ابعدية عني
وقوليلة يعتقني بقي
انا خلاص قولت كل حاجة
فا بصيت علي المكان الي كانت بتشاور علية ...
ملقتش حد
فارجعت سألتها
وقلت..
انتي بتكلمي مين ؟
انا مش شايفة اي حد معانا في الاوضة
فا انهارت اميرة بالعياط
وهي بتحاول تقنعني بوجود سعيد معانا
وقالتلي....
سعيد كان بيطلعلي في الضلمة كل ليلة
والنهاردة الصبح كان هيقتلني
ودلوقتي قمت من النوم
لقيتة بيحاول يذب&حني
اهوه... انا سامعة صوتة في وداني وهو بيكلمني
انتي سامعاه يا ملك
قلت..لا مش سامعه حاجة
فا ردت اميرة
وقالت..
انا عارفة انك ممكن تكوني مش سامعة صوتة
لكن ...
ازاي مش شايفة اثر ايدة علي جسمي
دا اثر قبضتة مازالت علي ذراعي اهية
ازاي مش مصدقاني يا ملك؟
دا انتي بنفسك شهدتي انك شوفتي سعيد هنا في البيت
حتي بالامارة
قولتي انه استخبي مننا في الحيطة لما دخلنا عليكم انا والامن
في اللحظة دي
سمعنا انا واميرة صوت باب الاوضة بتاعتها بيتفتح
علينا
واعتقدت اميرة بان سعيد هو الي بيفتح الباب عشان يأذيها
فا وقفنا متسمرين
واحنا بنبص علي سعيد الي هيدخل من الباب
لكن... بعد ما الباب اتفتح
سعيد مظهرش
والي ظهر امامنا هو...
ضابط المباحث
الي بصلي و قالي..خلاص تمام اوي كده يا ملك
وفي ثواني كانت دخلت القوة الي معاه
وانتشروا في المكان
بعدما احكموا قبضتهم علي اميرة
وقالولها ..
انتي مطلوب القبض عليكي بتهمة قتل سعيد عامر
ومطلوبة كمان في جرائم تانية غيرها
فا فهمت اميرة الخديعة الي اتعرضت لها
وفضلت تصرخ...
وتقولهم...
انا معملتش حاجة
صدقوني انا بريئة
ملك هي الي قتلت سعيد عامر
فا شاور الضابط لرجال الشرطة بانهم ياخدوني معاهم .
......
طبعا انتوا كده تهتوا مني
وزمانكم عايزين توضيح للاحداث الي فاجئتكم بيها دي
حاضر هفهمكم كل حاجة
بس عشان تفهموا
سر قلبة الاحداث دي
لازم اعمل فلاش باك وارجع بالاحداث للخلف
ومش هرجع اوي
انا هرجع بس لليوم الي ضربت فيه الرصاص علي الهجام
في اليوم دا
بدات اشك في اميرة
من اول ما عرفت من يمني صاحبتي ان جعفر مات في السجن
و لما روحت لمنال خطيبة جعفر...عرفت منها التاريخ الي اتحبس فيه جعفر
والتاريخ دا اثبت ان جعفر لا يمكن يكون له علاقة بقتل سعيد عامر
وعرفت كمان ان جعفر مات
من اسبوع في مستشفي السجن
بعدما اتصاب في حريق كبير واصابتة كانت من الدرجة الثالثة..
يعني جعفر كان في حالة خطرة جدا
لدرجة انه دخل في غيبوبة لفترة كبيرة
وكل دا بينفي بالدليل القاطع..اي صلة لجعفر بالهجام الي انا قتلتة
وساعتها بس
بدات اركز في الاحداث الي مريت بيها
عشان استوعب .. وافهم الي كان بيحصل
وافتكرت ساعتها ان كان في فرق كبير
بين صوت جعفر الي كنت بكلمة في الموبيل
وبين صوت الهجام الي انا قتلتة
م الاخر
اتأكدت...
ان استحالة يكون جعفر خطيب منال له اي علاقة بالهجام
ودا خلي الظن والشك زاد في دماغي من ناحية اميرة
وخصوصا بعدما شوفت الفيديوا الاباحي بتاعها
وعرفت علاقتها القذرة بسعيد جوز امي
فا جزمت بان اميرة هي الي زقت عليا الهجام
( جعفر المزيف)
بدليل ان الهجام كان بيطلب مني اني اقتل محمد
والوحيدة الي هتستفاد من قتل محمد هي اميره
دا غير ان الهجام كان عارف معلومات كتير عني
ودا معناه ان اميرة اكيد برضوا كانت تعرف نفس المعلومات
بس كانت مش مبينة انها تعرف حاجة
يعني كانت ناوية ليا علي الشر انا ومحمد
وبعدما اتجمعت كل الخيوط الي بتربط اميرة بالي بيحصل
كان لازم ابلغ البوليس
وخصوصا ...
اني ساعتها كنت بعاني من تأنيب الضمير
بسبب محمد الي اتحبس ظلم بدالي.... وفداني بنفسة
فا لقيت اني لازم اسلم نفسي
فورا عشان محمد يخرج من الحبس
ولازم اعترف باني انا الي قتلت الهجام ....
حتي لو هيعدموني
وبالفعل..
روحت علي القسم وقابلت ضابط المباحث
واعترفت له بالحقيقة
وقلتلهم اني انا الي اطلقت النار علي الهجام لانة كان عايز يغتصبني
و يظهر ساعتها ان تحقيقات الشرطة كانت اسفرت عن معلومات جديدة
لان الضابط بدل ما يأمر بحجزي في القسم
طلب مني اني اساعدة
وانفذ كل الي هيطلبة مني
عشان محمد يخرج من الحبس بسرعة
فا رديت بكل حماس
وقلتلة موافقة طبعا
ايه الطلبات الي حاضرتك عايزها مني؟
فا قالي الضابط علي طلباتة
ونفذتها بالفعل
وطلبات الضابط
كانت ...
اني اوهم اميرة
بان قرين سعيد حواليها في البيت
واني شوفت سعيد جوز امي اكتر من مره ..
واحاول أوهمها انه بيستخبي جوه الحيط
وكمان كان مطلوب مني ادخل غرفتها ..واضع حبوب هلوسة في علبة السكر بتاعتها
ودا حصل في اليوم الي دخلت فيه لغرفة اميرة و عملتلها نسكافية
واخدتة مني و سكبتة في الحوض
اصل اميرة كانت بتحطاط مني ومقبلتش تشرب النسكافية لا حاطة حاجة في الكوباية
ومكنتش فاهمة اني وضعت لها حبوب الهلوسة في السكر
الي هتستعمل بعد كده في جميع مشروباتها
وفعلا الحبوب فادت كتير في التهيؤات الي اميرة كانت بتشوفها
دا غير المؤثرات الصوتية والسمعية
الي كانوا بيشغلوها لاميرة
وكل دا كان له تأثيرة
في اقناع اميرة بوجود عفريت سعيد في البيت
وخلاها تتاكد ان عفريت جوز امي
بيظهر فجاءة وبيختفي فجاءة
وممكن يقتلها في اي وقت
المهم
بعدما نفذت الي طلبة مني الضابط بالحرف
اكتشفت ان الضابط جند رجال الامن ...والبواب... وكل الي بيشتغلوا في الفيلا
عشان ينفذوا نفس الهدف
وبالفعل الكل نفذ الاوامر
بكل دقة
وادعوا بانهم شافوا راجل دخل غرفة الامن واشعل الحريق
وغيرها من الشهادات الزائفة
وبعدما رجال البوليس اتاكدوا ان اميرة وصلت لحالة صعبة من انهيار الاعصاب
الليلة دي ضغطوا عليها
واوهموها بان سعيد بيهددها
وطلبوا منها باسم سعيد
انها تعترف ليا بالحقيقة كلها
واثناء ما كانت اميرة
علي يقين بان عفريت سعيد ظهرلها في غرفتها...وبيأمرها انها تصارحني بالحقيقة
انهارت اميرة واعترفت بالحقيقة
وطبعا رجال البوليس استمعوا لاعترافاتها وسجلوها عليها كاملة
ومفروض دلوقتي انهم هياخدوني مع اميرة لاني اعترفتلهم علي نفسي
وبعدما ركبت البوكس
فضلت افكر في كل الاعترافات الي اميرة اعترفت بيها
واكتشفت ان مازال في الغاز لسة متحلتش
زي مثلا..
١_ماما فين دلوقتي؟
٢_ مين الي شغل الشاشة الي عليها الفيديوا الاباحي بتاع اميرة؟
٣_ فين الموبيل بتاعي واختفي فين كده؟
٤_ياتري محمد عرف اني دفعت لقاتل مأجور عشان يقتل ابوه ولا لسة؟
٥_ وياتري محمد هيعمل ايه لما يعرف ان الجنين الي في بطني يبقي ابن سعيد ابوه؟؟
لا لا لا انا عمري ما هقول لمحمد علي حاجة زي دي
والسر ده هيفضل معايا لغاية ما اموت
كفاية عليا ان محمد يعرف باني كنت هقتل ابوه و زمانة دلوقتي بيفكر
انه يقتلني؟....او ..يسلمني لعشماوي؟
فا بلاش يعرف باقي المصايب
وقبل ما انتهي من صراع الافكار الي كانت في دماغي
انتبهت علي صوت الشاويش بيأمرنا بالنزول من البوكس
عشان ندخل علي القسم
وبالفعل دخلونا انا واميرة
ووقفنا امام الضابط
واثناء ما كان الضابط بيسألني
وبيقولي...لية حاولتي تقتلي زوج امك؟
اتفاجئت بمحمد ادامي
وكان واضح انه قلقان عليا اوي
فا اتخرس لساني
وتوقفت عن الاجابة
لكن الضابط صرخ فيا
وعاد عليا السؤال تاني
فا كان لازم اجاوب
واقول الحقيقة كاملة كمان
لكن...
قبل ما انطق بكلمة واحدة
سمعت صوت مش غريب عليا
جاوب
وقال...انا عندي اجابة للسؤال ده يا حضرة الضابط
فا التفت بسرعة لمصدر الصوت
عشان اتفاجئ بصدمة جديدة
عارفين مين الي كان عايز يجاوب علي السؤال ........؟
لو عايز باقي احداث الرواية صلي علي رسول الله
وطبعا مش هننسي نضع عشر ملصقات مع متابعة صفحتي الشخصيىة
مع تحياتي
الكاتبة
حنان حسن
امها او محمد مفيش ثالث
ردحذفصل الله عليه وسلم
ردحذفاللهم صل وسلم وبارك على سيدنا محمد
ردحذفاكيد امها متشوقه للجزء القادم 💚🩵
اللهم صل وسلم وبارك على سيدنا محمد وعلى آله وصحبه أجمعين
ردحذفامها اكيد
ردحذفاللهم صل وسلم على نبينا محمد وعلى آله وصحبه أجمعين وسلم تسليما كثيرا إلى يوم الدين
ردحذفاللهم صل وسلم وبارك على سيدنا محمد وعلى أهله وأصحابه والتابعين ومن تبعهم بإحسان إلى يوم الدين
ردحذفتسلم الانامل ....
ردحذفاكيد مامتها
اللهم صلي وسلم وبارك على سيدنا محمد وعلى آله وصحبه أجمعين وسلم تسليما كثيرا إلى يوم الدين
ردحذفاللهم صل علي سيدنا محمد.
ردحذفاللهم صل وسلم على سيدنا محمد وعلى آله وصحبه وسلم
ردحذف