رواية فتاة نصف الليل الجزء الثالث للكاتبة/حنان حسن بعدما اتفقت امل معايا علي انها هتساعدني علي ان الباشا يحبني في مقابل.. ...
رواية فتاة نصف الليل الجزء الثالث
للكاتبة/حنان حسن
علي انها هتساعدني
علي ان الباشا يحبني
في مقابل..
اني انا كمان اساعدها
عشان تتزوج الي بتحبة
تركتني امل
ودخلت لغرفة الباشا
وانا فضلت واقفة مرعوبة
بره
وخايفة لا تعمل مصببة
والباشا يفهم انها انا..
لكن... بعد شوية
الباب عند الباشا اتفتح
واتفاجت بيها
وهي.. خارجة بتضحك
وبتقولي...
خلاص... اعتبري الباشا بقي مجنون بيكي...
بصيتلها بدهشة
وقلت...
ايه الهبل الي انتي بتقولية ده؟
ردت امل
وقالت... بقولك خلاص
الحاجز الي بينك وبين الباشا اتشال
وبكره الصبح هتشوفي
وتتاكدي من كلامي
فسالتها
قلت..
هو انتي لما دخلتي الغرفة عملتي اية بالظبط؟
قالت.. ملكيش تسالي
وانا مش ملزمة اجاوب
انتي كل الي يلزمك
اني اخلية يحبك
وانا ساعدتك
ودلوقتي جه دورك انك تساعديني
في اللحظة دي
عرفت انها بنت نصابة... وكدابة
ازاي بتقول...
انها ساعدتني... وقدرت تخلي الباشا يحبني؟
اذا كان الباشا نايم اصلا
واضح انها بنت نصابة
ووراها بلاوي
وممكن تورطني معاها
وعشان كده
قررت اني افضحها..
واخلي الباشا يمسكها
فا قلتلها...
انتي نصابة
وانا لازم اعرف الناس حقيقتك
و فضلت اصرخ... اصرخ
عشان... كل الي في البيت يجوا يمسكوها
وفي اللحظة دي
امل بصتلي بغيظ
وسابتني ومشيت
فا حاولت اروح وراها
عشان امنعها من الهرب
لكن للاسف
وقعت علي الارض وانا بجري وراها
وهي بتحاول تهرب
وللاسف
معرفتش امسكها
وبعد شوية...
لقيت ماما جاية تجري علي صوتي
ومعاها عم عثمان
الطباخ
واول ما ماما...
شافتني
واقعة ع الارض
اتفزعت..
وسالتني
مالك يا قلب امك
فيكي ايه؟
قلت..
حد يلحق امل يا ماما قبل ما تهرب
ردت ماما
وقالت.. امل مين؟
قلت..
البت الي فيها شبه كبير مني
ولابسة هدوم زي هدومي
بصتلي ماما بتعجب
وقالتلي...
هي فين البت دي؟
ودخلت هنا امتي؟
وازاي؟
قلت..
هي كانت هنا حالا
بس انا طردتها
بعدما خرجت من غرفة الباشا
بصتلي امي باستغراب
وقالتلي..
رنا يا حبيبتي
هي مين دي الي دخلت غرفة الباشا؟
اولا...
الباشا نايم في غرفتة
ولو كان حد دخل عنده
كان زمانة صحي
ثانيا.. البواب بره
مش بيدخل اي حد بدون ما يعرف هو مين
والبوابة مقفولة
يبقي ازاي دخلت لغاية هنا؟
قلت.. صدقيني يا ماما
الي اسمها امل دي
كانت هنا حالا
وانا فضلت اصرخ عشان اصحي الباشا
عشان يقبض عليها
لانها هي الي قتلت نوسة... ودوسة
وضعت امي ايديها علي راسي
وقالت..
غرببة مع انك مش سخنة
امال ليه عمالة تخرفي؟
قلت.. لا انا مش بخرف
وانا هحكيلكم
علي الي حصل مع امل بالظبط
عشان تصدقوني
وبالفعل...
سردت كل ما حدث
لماما....
وعم عثمان الطباخ
من اول اليوم الي شوفت فيه امل
لغاية الليلة
وفي اللحظة دي
ماما فضلت تعيط
وتقول لعم عثمان
اعمل ايه يا عم عثمان؟
البت شكلها اصابها مس من الجن
او حد عملها عمل؟
رد عم عثمان
وقال... عمل ايه؟
وجن ايه؟
يا ست ام رنا؟
سيبي الكلام ده لله الناس الجهلة
بنتك نفسيتها تعبانة
ومحتاجة دكتور نفساني
وفي اللحظة دي
سمعت صوت راجل اول مرة اسمعة
بيقول.. انا اعرف مكان دكتور
نفساني كويس
بصيت باتجاه الصوت
لقيتة شاب غربب
اول مره اشوفة
ولما عم عثمان شاف الشاب
بدء عم عثمان يعرفنا علية
وقال..
ده ابني خالد يا ام رنا...
بيشتغل ميكانيكي سيارات اد الدنيا
بس جه يعيش معايا في غرفتي
الي في الجنينة
لما طليقتة اخدت عليه حكم
واخدت منه الشقة
ردت ام رنا
وقالت... ربنا يخليهولك
رد عم عثمان
وقال...
خلاص يا خالد
من بكرة باذن الله
تاخد الست ام رنا وبنتها...
وتروح معاهم...
تعرفهم مكان الدكتور النفساني
رد خالد
وقال.. خلاص ماشي
وبالفعل...
تاني يوم
اخدنا خالد
انا.... وامي
وروحنا لطبيب نفساني
وكانت عيادة كبيرة في وسط البلد
هي صحيح كانت غالية
بس امي قالت
مش مهم ثمن الكشف
اهم حاجة بنتي تبقي كويسة
المهم..
بعدما دفعنا ثمن الكشف
تركت كل بياناتي عند الممرضة الي بره
وبعدها..
دخلت للدكتور
لوحدي طبعا
واول ما دخلت غرفة الكشف
شوفت الطبيب النفساني الي قاعد علي مكتبة
وكان طبيب في اواخر الثلاثنيات
وباين عليه انه بيكسب
كويس
من منظر العيادة
الشيك
الي كنت فيها
واول ما قعدت ادامة
سالني؟
اسمك ايه؟
قلت.. رنا
قال..
انتي جميلة اوي يا رنا
اتكسفت وبصيت في الارض
ولما الدكتور لاخظ كده
حاول يغير الكلام
وسالني
قال... خير يا رنا؟
قلت..من كام يوم كده
بدات اشوف بنت من سني
وكانت بتبقي لابسة نفس اللبس
الي بكون لبساه
و.....
وبعد ما سردت للطبيب كل حكايتي مع امل
لقيتة بيبصلي
وبيقولي...
يعني اخر كلام ليها معاكي
انهاكانت عايزة تساعدك؟
وتجوزك للانسان الي انتي بتحبية؟
قلت.. ايوه
دي كمان دخلت للباشا
غرفة النوم
ومعرفش عملت ايه عنده
جوه
وخرجت تقولي انه خلاص بقي بيحبني بجنون
وطبعا هي بتكدب
فضل الطبيب يبصلي..
ويتابع حركات ايدي
وتعابير وجهي
وبعدما
فكر الطبيب
شوية
قالي....
انا مش عايزك تقلقي
خالص
دي عبارة عن تهيؤات
مش اكتر
نتيجة تعرضك لضغط عصبي
والي بيحصل معاكي ده
شيئ عادي
وبيحصل لناس كتير...
وبيتخلصوا من المشكلة دي بسهولة جدا
لو اتعاملوا معاها صح
قلت..
يعني انا هتعامل مع امل دي علي انها تهيؤات؟
ولا حقيقة؟
قال...
احنا هنتعامل معاها علي انها حقيقة
عشان نقدر نتغلب عليها
فكرت شوية
وقلتلة
وحتي لو اعتبرت ان كلام حضرتك منطقي
انا هتعامل ازاي مع حالة التهيؤات دي
علي انها حقيقة؟
قال...
لازم امل تيجي لغاية هنا
فسالتة بتعجب
وقلت..
قولي... ازاي؟
وانا مستعدة اعمل اي حاجة
عشان...
اخلص منها؟
رد الطبيب
وقالي
اسمعي... انا عندي حل كويس جدا
قلت.. ايه هو؟
قال.. ايه رايك لما امل تجيلك تاني..
تخليني انا الي اتعامل معاها؟
قلت.. ازاي؟
قال.. هي مش عرضت عليكي انها تساعدك
انك تتجوزي الي انتي بتحبية؟
قلت.. اه حصل
قال.. خلاص
فهميها انك كدبتي عليها...
وعمرك ما حبيتي الباشا
وفهميها كمان
انك..
بتحبيني انا
وعايزة تتجوزيني انا
وساعتها
هي هتجيني هنا
وانا هعرف اتعامل معاها
قلت.. ايوه بس دي ممكن متجيش تاني
عشان انا هددتها اني هفضح امرها
قال.. لو مجتش تاني يبقي انتي خفيتي من التهيؤات
ومش هيبقي فيه لازمة للعلاج
وسالني الطبيب
وقال.. انتي فاهماني يا رنا؟
قلت.. مش اوي
بس ماشي
هنفذ كل الي حضرتك هتقول عليه
ابتسم الطبيب وهو بيودعني
وقالي...
سواء رجعتلك امل
او مرجعتش
لازم تيجيني العيادة تاني
في ميعاد الاعادة
قلت.. حاضر
وبعدما تركت عيادة الطبيب
رجعنا لبيت الباشا
انا... وماما... وخالد ابن عم عثمان
واول ما وصلنا لباب البيت
لقيت الباشا في انتظارنا
ومعاه عم عثمان
وكان الباشا في اللحظة دي
واقف...
ووجهة مليئ بالغضب
وقال.. كنتوا فين كدة؟
ردت ماما
وقالت..
معلش يا باشا
كنا بنكشف علي رنا
اصلها كانت تعبانة
بص الباشا لخالد
وقال...
انت مين اذنلك تروح معاهم
عند الدكتور؟
رد عم عثمان
وقال...
ياباشا انا الي طلبت منه
يعرفهم مكان الدكتور
بص الباشا لعم عثمان بغضب
وقال..
تقدر تقولي
ايه الي مقعد ابنك معاك في الغرفة الي تحت اصلا؟
مش معني انك بتشتغل هنا
يبقي تعملهالي لوكاندة
وصرخ الباشا فيهم
وقال.. ابنك ده يمشي من هنا فورا
انت سامع ولا لا؟
رد عم عثمان
وقال... حاضر يا باشا
وفي اللحظة دي
رمقني الباشا بنظرة غضب
وبعدين قال لماما
اظن كان مفروض تستاذني
قبل ما تاخدي بنتك...
وتخرجي
ردت ماما
وقالت..
انا غلطت فعلا يا باشا
ومش هتتكرر تاني
رد الباشا بغضب
وقال..
اتفضلي خدي بنتك وادخلوا جوه
وبالفعل دخلت انا وماما
للبيت
وكنت متغاظة جدا
من تصرف الباشا معانا
وتحديدا.. من طريقة كلامة مع ماما
هو ازاي يزعق لماما اصلا؟
احنا صحيح بنشتغل عنده
لكن
.. مش عبيد
ولا اشترانا بفلوسة
وبصراحة...
كنت متديقة جدا
من الي عملة الباشا معانا
فا قلت لماما
انتي ازاي تسمحيلة يشخط فيكي كده؟
ده انتي كان ممكن يبقي عندك ابن في سنة
مسحت ماما دموعها
وقالت..
معلش يا بنتي اكل العيش مر
قلت... لا بناقص لقمة العيش
الي هنتنازل عن كرامتنا
عشانها
اتفضلي يلا لمي هدومك
وتعالي نمشي من هنا
ردت ماما
وقالتلي..
مقدرش اسيب الست الكبيرة
وهي تعبانة كده
قلت... لامفيش الكلام ده
احنا هنمشي من هنا
ولو انتي
مش قادرة تخرجي تقولي للباشا
اننا هنمشي
هخرج انا وهقولة
وبالفعل خرجت
وانا في منتهي الغضب
وروحت لغرفة المكتب
الي الباشا كان قاعد فيها
وخبطت علي الباب
فا سمعتة
بيقول...
ا دخلي
دخلت من الباب
ولما شوفتة ادامي
وهو... بيبصلي بعنية العسلية
وبيبتسم ابتسامتة الجميلة
نسيت انا كنت جاية ليه؟
لكن لما سمعتة
وهو بيسالني...
وبيقول..
في حاجة يا رنا؟
استجمعت شجاعتي
وقلت... ايوه في
اانا جاية اعرف حضرتك
اننا هنمشي
عشان حضرتك تلحق تشوف حد غير ماما
يراعي الحاجة
بعدما قلت الكلمتين
فضلت واقفة منتظرة رد الفعل القاسي
الي هيصدر من الباشا
لكن اتفاجئت
انه بيقولي..
عايزة تمشي وتسيبيني
يا رنا؟
هو ده الي اتفقنا عليه امبارح؟
بعدما استمعت للسؤال الي قالة الباشا
فضلت ابص حواليا
عشان اشوفة بيكلم مين؟
بس ملقتش حد في الغرفة غيري انا... وهو
فرجعت بنظري للباشا
تاني
ولقيتة بيكمل كلامة
وبيقول...
يارنا انا عارف اني اتعصبت عليكم
بس غصب عني..
انا من ساعة ما عرفت
ان الولد المكانيكي ده خرج معاكم.... وانا هتجنن
ارجوكي متزعليش
وحياة كل لحظة حلوة عيشناها مع بعض
يا رنا تسامحيني
تنحت للباشا شوية لغاية ما خلص كلام
ولما ملقتش كلام ارد عليه بيه
فا قلت.. نعم؟
رد الباشا
وقالي..
نعم ايه بس؟
انتي ازاي يهون عليكي حبنا؟
بعدما سمعت
سؤالة
اصابني داء الحول
وقلت.. حبنا؟
رد الباشا
وقال.. ايوه حبنا
انتي بسرعة نسيتي الي حصل بينا
في الليلة اياها؟
قلت.. الليلة نهين؟
قال... ايه ده؟
بسرعة كده نسيتي كلامك الي قولتية
قلت.. نهون؟
رد الباشا
وقالي.. ايه ده يا رنا
باين عليكي رجعتي في كلامك
قلت... كلام مين؟
اقصد كلام ايه؟
رد الباشا
وقالي..
علي العموم
حتي لو رجعتي في وعدك ليا
انا هفضل احبك
وهفضل منتظر موافقتك علي الجواز
قلت.. كمان جواز؟
وهنا افتكرت كلام امل
فا استوقفت الباشا في الكلام
وسالتة
قلت..معلش بس بعد اذنك ممكن سؤال
قال..اسالي يا قلبي
قلت..
هو احنا حصل بينا ايه بالظبط؟
رد الباشا
وقالي...
حصل بينا كل حاجة
قلت... اكيد حضرتك كنت تقصد تقول
حصل بينا كل خير
لكن عشان كلمة (خير) وكلمة (حاجة)
حروفهم زي بعض
فا اكيد حضرتك اتلخبطت
رد الباشا
وقالي..
ايه الاسالة الغرببة دي
يا رنا؟
منتي عارفة ان حصل بينا كل حاجة
قلت..
اه كل حاجة يبقي انا سمعتها صح
رد الباشا
وقالي... سيبك بقي من الاسالة دي كلها
وقوليلي
انتي فكرتي ولا لسة؟
قلت.. فكرت في ايه؟
قال.. في جوازنا
في اللحظة دي
حسيت اني هيغمي عليا
فااستاذنت الباشا
وقلت...
معلش بعد اذنك
انا.....
هروح اشوف ماما..
عشان...
كانت تعبانة اوي
وكانت عايزاني اجيبلها مرطب الشفايف... اقصد...
دواء الضغط
ابتسم الباشا
وقالي
عموما انا منتظر ردك ...
بفارغ الصبر
قلت.. ربنا يسهل
بعد اذنك
وبسرعة مشيت من ادامة
وانا مش مصدقة نفسي
ولا قادرة اصدق الي سمعتة من الباشا
وفضلت ماشية لغاية
مادخلت الغرفة بتاعتي
انا.... وماما
عشان اختلي بنفسي
وقعدت ع السرير
وانا سرحانة... وبفكر في كل الي حصل
وبعد ما قعدت ع السرير
سمعت صوت
بيقولي
ايه يا بنتي حاسبي قعدتي علي رجلي
اتفزعت من الصوت
وبصيت
علي السرير
واتفاجئت ب(امل) تاني
ولقيتها بتقولي
ها ايه رايك بقي في خدماتي؟
مش قولتلك اني هخلية يحبك؟
ويموت فيكي؟
في اللحظة دي
افتكرت كلام الطبيب
الي قالي لو عايزة تخلصي من امل
اوهميها انك مش بتحبي الباشا
وبتحبي الطبيب الي بيعالجك
فا بصيت لامل
وقلت... فين حبيبي ده؟
انتي بتتكلمي عن مين؟
قالت.. الباشا حبيبك
قلت.. ومين قالك اني بحب
الباشا؟
انا بحب الطبيب الي بيعالجني
ونفسي جدا تساعديني يا امل وتروحيلة
وتخلية يحبني ويتجوزني
ردت امل
وقالت.. ولو ساعدتك
وخليت الدكتور يحبك ويتجوزك
هتساعديني انتي كمان؟
قلت.. هساعدك
قالت.. خلي بالك
لو خلفتي وعدك معايا انتي ممكن تتاذي
قلت.. روحي بس انتي
للدكتور
وانا هبقي اساعدك
عشان تتجوزي الي بتحبية
ابتسمت امل وسابتني ومشيت
وانا رجعت اسرح
و افكر في الي حصل مع الباشا من شوية
وفضلت في حالة الشرود دي كام يوم
وكنت بحاول متقابلش مع الباشا خالص
في اليومين دول
لغاية ثالث يوم
لقيت الباشا جاي
يقولي
رنا....
انا هتنقل بلد تانية
وعايز اتجوزك قبل ما اسافر
قلت.. جواز ايه بس يا باشا؟
حضرتك مش فاهم الي حصل؟
مش انا البنت الي دخلت عند حضرتك الغرفة
دي......
وقبل ما اكمل كلامي
رد الباشا
وقال..
مفيش وقت للكلام
دلوقتي يا رنا
انا خلاص كلمت مامتك
ووافقت
وقالتلي اتصل بالماذون
قلت.. ازاي ماما تقولك هات الماذون
بدون ما تاخد راي
رد الباشا
وقال...
اهدي بس
انا عارف انك زعلانة
عشان عايزة فرح
احنا صحيح هنكتب الكتاب هنا في البيت
بينا وبين بعض
في هدوء
نظرا لتعب الحاجة
لكن اوعدك
يوم الدخلة هعملك احلي فرح في الدنيا
قلت.. يا باشا من فضلك اسمعني
مسك الباشا ايدي بحنية
وبص في عينيا
وسالني..
وقالي.. نعم؟
سامعك يا قلبي
عايزة تقولي ايه؟
وفي اللحظة دي
لما بصيت في عين الباشا
قلت... عايزة مية بسكر عشان
حاسة اني هيغمي عليا
رد الباشا
وقالي.. الف سلامة عليكي حبيبي
ونادي الباشا علي ماما
وبسرعة جت ماما ومعاها المية بسكر
وهي بتقولي
الف سلامة عليكي يا عروسة
قلت.. عروسة؟
هو الباشا كلمك يا ماما؟
ردت ماما
وقالت..
ايوه حبيبتي
الف مبروك
ولما لقيت ماما باركتلي
عرفت ان الموضوع بجد
والي اكدلي...
اني مش بحلم
اني لقيت الماذون داخل
هو والشهود
وبالفعل..
عقد قراني علي عبد الحميد باشا
وكنت قاعدة مذهولة....
و مش مصدقة نفسي
لغاية ما رن الموبيل
بتاعي
وفوقني من ذهولي
قلت.. الوو
رد المتصل
وقالي.. الووو
انسة رنا؟
قلت.. ايون يا فندم
مين معايا؟
قال.. انا الدكتور تامر
طبيبك النفساني
قلت.. اه اهلا يا دكتور
رد الدكتور
وقالي..
معلش كنت عايزك تيجي العيادة حالا
قلت.. ليه في حاجة؟
قال.. ايوه في حاجة
خطيرة
وكنت عايز اقابلك حالا
بس ياريت تيجي لوحدك
قلت.. بس انا مش هقدر
اجي لغاية العيادة
دلوقتي
عشان عندي ظروف
رد الدكتور
وقالي..
خلاص اديني عنوانك
وانا هاجي لاقرب مكان عندك
وانزلي قابليني
قلت... حاضر
وبالفعل اخد العنوان
ووصل لمكان قريب من بيت الباشا
واتصل عليا
ونزلت عشان اشوف في اية؟
وبعد ما جلست بجانب الدكتور بسيارتة
لقيتة بيقولي
انا عارف انك كنتي تعبانة...
والحالة كانت عندك
ساعة ما جيتيلي
بس واضح دلوقتي انك في حالتك الطبيبعية
فا من فضلكم هاتي الفيدوهات حالا
قلت...
حالة ايه؟
وفيديوهات ايه؟
في ايه يا دكتور؟
رد الطبيب باسف
وقال...
للاسف يارنا
انتي جيتي اليومين الي فاتوا العيادة
وكنتي بتحاولي تغريني
قلت... ايه الكلام الي
حضرتك بتقولة ده يا دكتور؟
حضرتك هتهرج ولا ايه؟
رد الدكتور
وقالي.. اسمعي بس يا رنا
وانا هفهمك كل حاجة
انتي لما جيتي العيادة
وكنتي بتحاولي تغريني
انا طبعا فهمت ان الحالة كانت عندك ساعتها
وكنت عارف انك متقمصة شخصية امل
وكنت عارف ان امل هي الي بتكلمني
فا حاولت اوهم امل اني متجاوب معاها
ولما سالتني ان كنت بحبها فا قلتلها... اني بحبها
ولما طلبت مني اننا نتجوز وافقت طبعا
وبصراحة هي كانت جريئة لابعد الحدود
وانا غصب عني كان لازم اتجاوب معاها
ومكنتش اعرف انها بتسجل كل ده صوت وصورة
وتاني يوم لقيتها داخلة عليا بالماذون والشهود
وبتقولي..
يا اما... نتجوز حالا
يا اما... هتروح تفرج زوحتي واهلي علي الفيديوهات
فا اضطريت اتجوزك ساعتها
وقلت... لما ترجعي لحالتك الطبيعية
وشخصية امل تختفي..
اكيد هتديني الفيديوهات الي معاكي
وعشان كده
انا جاي دلوقتي
اخد الفيديوهات
بعد ما استمعت لكلام الطبيب
حسيت اني علي مشارف مصيبة
وفضيحة لا قبلها ولا بعدها
فسالت الطبيب
قلت.. معلش بس سؤال
يا دكتور؟
انت اتجوزتها باسم امل ولا اسم رنا؟
رد الطبيب وهو بيعطيني صورة من قسيمة الزواج
وقال..
للاسف الحالة عرفتني بنفسها
علي ان اسمها رنا
والماذون كتب الاسم في القسيمة رنا
قلت... ارجوك يا دكتور
انت لازم تطلقني
حالا
لاني لسة متجوزه الليلة
وانا كده هروح في مصيبة
رد الطبيب
وقال.. منا كمان متجوز
والفيديوهات الي معاكي هتخرب بيتي
قلت.. يعني ايه الكلام ده؟
رد الطبيب
وقال..
يعني تجببي الفيديوهات
اطلقك
غير كده لا
واتفضلي بقي انزلي من العربية
عشان وريا شغل في العيادة
وبالفعل نزلت من العربية
وانا حاسة ان رجليا مش قادرة تشيلني من الصدمة
لان امل اتجوزت الدكتور تامر باسم رنا
ومتصورة معاه فيديوهات فاضحة
عارفين ده معناه ايه....؟
لو عايز باقي احداث القصة
صلي علي رسول الله
وطبعا مش هننسي وضع عشر ملصقات مع متابعة صفحتي الشخصية
مع تحياتي
الكاتبة
حنان حسن
روعة
ردحذف🍎🍎🍎🍎🍎🍎🍎🍎
ردحذف🐵🐵🐵🐵🐵🐵🐵🐵🐵🐵
ردحذف💞💞💞💞💞💞💞💞
ردحذف🌽🌽🌽🌽🌽🍓🍓🍓🍓
ردحذفروعة ربنا يحفظك
ردحذفتم
ردحذف