ليلة العمر الجزء الاول للكاتبة حنان حسن لما تبقي عانس وامك وامك بتعمل دخلتها في الاوضة الي جنبك.... فا ده الوجع بعينة انا مش جم...
الجزء الاول
للكاتبة حنان حسن
لما تبقي عانس وامك وامك بتعمل دخلتها في الاوضة الي جنبك....
فا ده الوجع بعينة
انا مش جميلة (وحشة)
والكل بيقول ان شكلي مش حلو
عمري تجاوز ال٢٥ ...
ولسة محدش اتقدملي
ويبدو اني مش هتجوز خالص
زي ما امي بتقول
اصل لوني اسمر غامق وشكلي مش بيعجب حد
انما امي...بيضاء وجمالها صارخ...وتبان اصغر مني في العمر كمان
عشان كده عرسانها كتير
المهم...
ليلة العمر الي جاية اصدمكم بتفاصيلها
تبقي ...(ليلة العمر بتاعة امي)
او...ليلة زفاف امي
علي عريسها
الي معرفش هي اتعرفت علية ازاي ...
ولا جابتة منين؟
في الليلة دي
كنت قاعدة في غرفتي
وانا عارفة ان امي بتحتفل هي وعريسها بليلة العمر
والمصيبة... ان دخلتهم كانت بتتم في الغرفة الملاصقة لغرفتي تماما
يعني انا كنت قادرة احس و اسمع هما بيعملوا اية
يااااااه
متتخيلوش اد ايه
الاحساس ده بشع
والمحزن في الامر
اني كنت بحاول امسك اعصابي طول الليل
وكنت قاعدة متسمرة في سريري
و انا بسمع ضحكات امي ...
وكلمات الغزل الي بيقولها لها زوجها
وفضلت متحملة كل ده طول الليل لغاية ما بقينا قرب الفجر
لكن... الي خرجني عن شعوري
هو...اني بدات اسمع.......
صوت خبط ورزع وحاجات بتتكسر
في اللحظة دي
خرجت من غرفتي
بعدما فقدت اعصابي
وقررت اوقف المهزلة الي بتحصل دي
مهو برضوا لازم امي وجوزها يفهموا
انهم مش لوحدهم في البيت
وفعلا...
خرجت من غرفتي وانا في منتهي الغضب
واتوجهت لغرفتهم
لكن...
اول لما خرجت من غرفتي
اتفاجئت بخالتي (مرصودة )
وهي بتتصنت علي الباب بتاع امي من بره
واستغربت من امر خالتي
اصل خالتي مرصودة مش عايشة معانا علي الدنيا اصلا
لان حياتها كلها مع الجن والعفاريت
الي هي بتتكلم معاهم ليل نهار
زي المجانين
لغاية ما بقت كل تصرفاتها كلها جنان في جنان
المهم ..
لما شوفت خالتي مرصودة
وهي واقفة ورامية ودانها علي باب امي وعريسها
اتعصبت عليها
وقلتلها..
انتي ازاي تقفي تتلصصي علي امي في ليلة دخلتها
يا خالتي ؟
فا تمتمت خالتي وهي بتبص بجانبها وكأنها بتكلم شخص مش موجود
وفضلت تهرتل بكلمات مش مفهومة
وبعدها ..بصتلي
وقالتلي...
(لازم الحق الديك قبل ما ينقر الفرخة)
فازاد غيظي من خالتي
الي بدات تلخبط في الكلام
وسألتها تاني بغضب
وقلت...
بقولك اية؟
سيبك بقي من الشويتين الي انتي بتعمليهم دول
وجاوبيني
...
لية بتبصي علي العرسان من خرم الباب ؟
فا ردت خالتي
وقالتلي...هو انتي مش مصدقة...
اني واقفة هنا عشان كنت خايفة علي الفرخة
من الديك ؟
قلت...لا مش مصدقاكي طبعا
ومتأكدة انك كنتي واقفة عشان تبصي عليهم وهما نايمين
في اللحظة دي
قبضت خالتي مرصودة علي ايدي بقوة...
وبايدها التانية فتحت الباب علي امي وعريسها
وجرتني غصب عني لداخل الغرفة
وفي الاخر...
دفعتني بكل قوتها
بداخل غرفة العرسان
وبعدما بقينا انا وخالتي في الغرفة
اشارت خالتي مرصودة علي سرير العرايس
ولقيتها
بتقولي ..
اهو يا ستي عريس امك
ولما بصيت علي السرير استغربت
اصل العريس مكنش علي السرير
وكل الي شوفتة في الغرفة
وعلي السرير....
هي ماما فقط
لكن لاحظت ان ماما كانت ماسكة في ايديها طير ميت
والطير كان من الطيور الي بتتربي في البيت
و تحديدا كان (ديك) بعرف احمر
واول ما امي بصت علي الديك
الي في ايديها واتاكدت انه مات
رمته علي خالتي
وفضل الديك الميت بحوزة خالتي
فا فضلت ادور بعنيا في الاوضة علي العريس عشان اعتذرلة
لكن ...ملقتوش
فا قلت لنفسي
يمكن العريس في الحمام..
ولا يمكن بيشرب سيجارة في البلكونة
وبسرعة اعتذرت لماما
وقلتلها...
معلش يا ماما
اصل خالتي هي الي فتحت الباب عليكم
فجائة ....
عموما ...
انا هاخد خالتي وهنخرج حالا
وانتي ابقي اعتذري لجوزك علي الي حصل ده
فا بصت امي للديك الي كان ميت علي ايد خالتي
وقالت...
ويفيد باية الاعتذار
ما خلاص مات
فا وقفت ابص لامي وانا مستغربة
وقلت...هو مين الي مات؟
انتي بتتكلمي عن مين؟
فا ردت ماما
وقالتلي
بتكلم عن العريس الي مات في ليلة دخلتة
فا فضلت واقفة بدون ما تكلم
وكنت بحاول اركز يمكن افهم حاجة
فسالتها تاني
و قلتلها ..
انتي بتتكلمي جد ؟
يعني جوزك الي كان معاكي من شوية مات فعلا؟
طب هو فين؟
فا ردت خالتي مرصودة
وهي بتشاور
علي الديك الي في ايديها
وقالتلي..
جرالك اية يا بت؟
مهو العريس في ايدي اهوه
في اللحظة دي
زادت دهشتي
وقلت..ماما هو في ايه ؟
ما تقولوا كلام عاقل بس عشان اقدر استوعبة
وبدل ما ماما ترد عليا
وتفهمني الالغاز الي بسمعها...
لقيتها صرخت وهي بتبص لخالتي مرصودة
وفضلت تلطم
فا حاولت اهدي امي عشان تفهمني الي بيحصل
وفعلا...
بمرور الوقت هديت امي
تماما
وبعدما امي اتمالكت اعصابها
قعدتني جنبها
و فهمتني حقيقة الجنان الي احنا فيه دا كلة
وبمجرد ما سمعت منها الحقيقة البشعة
اترعبت وخرجت اجري علي غرفتي
واتدفست في سريري
لكن...حتي وانا في سريري كنت مرعوبة وجسمي كلة كان بيتنفض
فا خرجت من غرفتي
وحاولت اهرب من جو البيت المرعب
فا نزلت تحت علي الجنينة الكبيرة
الي محاوطة بيتنا
وبجانب اقرب شجرة قعدت افكر
في البلاوي المفزعة الي عرفتها الليلة دي
واشوف هعمل اية وهتصرف ازاي
طبعا انتوا كده تهتوا مني ..
وزمانكم مش فاهمين حاجة
وعايزين تعرفوا امي قالتلي اية
ثواني..
هسردلكم قصتي كلها
بالتفصيل
وهعرفكم السر الي امي قالتهولي
بس خلوني اعرفكم بنفسي
في الاول
انا اسمي الحقيقي ( ريم)
بس بينادوني
ب(حسنة البيت )
ببلغ من العمر ٢٥ سنة
شكلا..
عادية وجسمي حلو
لكن (سمرة لدرجة السواد )
عايشة في القاهرة
معايا مؤهل متوسط
بابا مطلق امي من زمان ومعرفش عنة حاجة
عايشة حاليا مع امي
واتنين من الخالات .
ودلوقتي بقي اقدر اسردلكم
روايتي بالتفصيل
حكايتي بتبدء
من يوم ما جدتي المشعوزة
( ام امي)
قررت تجذب خالتي مرصودة لعالم الجن و العفاريت
وتعلمها الشغلانة علي اصولها
اصل جدتي كانت متعمقة في المجال ده
وتقدروا تقولوا كانت بتتكسب منه
او..بتاكل منة عيش
المهم...
خالتي مرصودة دخلت فعلا للمجال واتمكنت منه
وبقت تقدر علي تسخير الجان وعمل الاعمال
في الوقت ده ...
كانت امي اتطلقت من ابويا بعدما خلفتني بكتير
وكمان كانت جدتي كبرت في السن وعقلها بدء يخف
وبدات جدتي تسخر الجان في اذية
الجميع حتي بناتها
ولما خالتي مرصودة شافت ان جدتي بتتصرف بدون وعي... وهتأذي الجميع
حاولت تسيطر علي تصرفاتها
و تقنعها بانها كبرت ولازم تعتزل المجال
فا رفضت جدتي طلبها رفضا قاطعا
فما كان من خالتي مرصودة الا ...انها اتفقت مع اخواتها البنات الاتنين
انهم يواجهوا امهم ويهددوها بانهم
هيحجروا عليها
وفعلا ..وقفوا الثلاث بنات امام الام
وهددوها با اقامة دعوي الحجر عليها او ايداعها مصحة امراض عقلية
لكن ده مخلاش جدتي تتراجع
بالعكس موقفهم ده جننها اكتر
وخلاها تبيع كل ما تملك في السر ... وتاخد مالها الي شقيت بية طول عمرها وتختفي
عشان بناتها يعلنوا افلاسهن
ويموتوا من الجوع
وياريت جدتي اكتفت بكده وبس
لا...
دا جدتي قررت تستعين بجميع خدامها من الجن
عشان تعاقب بناتها
قبل ما تختفي
وفعلا صب الجن لعنتة
علي بناتها الثلاثة
( امي واخواتها الاتنين)
واللعنة كانت بتتمثل
في ...
حرمان بناتها الثلاثة من الزواج
طول العمر
واي عريس هيرتبط بواحدة فيهن هيتحول( لديك )
قبل ما ينقر الفرخة
زي ما خالتي مرصودة قالتلي
واللعنة دي هتفضل تلاحقهم طول العمر
و اي واحدة من بناتها هتفكر تتجوز
هتكون بتحكم علي العريس بالموت
انما بقي لوحصلت علاقة محرمة
ا و تمت دخلة بدون زواج
فا في الحالة دي
الثلاث اخوات هيتقلبوا لثلاث فرخات وينتهي امرهن
يعني الي هتتهور وتعمل حاجة كده ولا كده
هتكون سبب في موت الاتنين التانين
بصراحة خالاتي الاتنين سلموا بالامر الواقع
وامتنعوا عن الجواز
انما امي...
قالت تستثمر الموقف لصالحها
فا لما عرفت بان جوازها من اي عريس هيتسبب في موتة
قررت امي انها تستغل الوضع ده
لجني المال
وخصوصا اننا مكنش عندنا مصدر دخل
فا بدات امي تبحث عن
اي شخص يكون غني
( ثري )
و ترمي شباكها علية
لغاية ما يتعلق بيها وبعدها تتجوزة
واول ما يموت تورثة
وبعد عدتها ما تخلص تشوف حد غيرة وهاكذا
ومن الميراث الي امي بتطلع بيه
بقينا من الاثرياء
وانا طبعا مكنتش فاهمة الصدفة الي بتوقع امي في عرسان اثرياء علي مشارف الموت
لكن فهمت كل حاجة لما امي صارحتني بالحقيقة
المهم ..
دلوقتي احنا كلنا ساكنين في برج
في مكان راقي وحوالية جناين
والحالة متيسرة
وبالنسبة لخالتي مرصودة
فا كانت بتعترض علي زواج امي ...
لخوفها من ان الدخلة تتم بالغلط
فا تتسبب امي في موتهم هما الثلاثة
عشان كده
يوم الدخلة خالتي كانت جاية لغرفة امي
عشان تطمن بنفسها
وبصراحة معرفش خالتي جهاد مجتش لية من المستشفي
عشان تطمن هي كمان علي موضوع الدخلة
ولا يمكن عشان خالتي بتختلف عن اخواتها الاتنين
فعلا صدق الي قال...
ان البطن قلابة
اصل الثلاث اخوات
عكس بعض تماما
فا مثلا
الشيخة مرصودة ...عايشة مع الجن والعفاريت والاعمال السفلية
وموضوع الجواز مش في دماغها
انما بقي خالتي الدكتورة جهاد
فا كانت بتستنشق العلم وبتعيش من خلالة
يعني العلم والطب كل حياتها
وافنت عمرها كلة في الدراسات العليا والدكتوراه وخلافة
وتقدروا تقولوا وهبت نفسها للعلم لغاية ما كبرت
ومبقاش حد بيتقدملها
يعني برضوا موضوع الجواز مش في حسابتها
وبصراحة خالتي الدكتورة
مش راضية علي تصرفات اخواتها ...
وديما علي خلاف مع خالتي المشعوزة
دي كمان بتحاول تعتزلهن وتبعد عنهن
عشان كدة لازم استعين بخالتي جهاد
واطلب منها انها تمنع امي عن قتل المزيد من الرجالة
واكيد هي هتقبل تساعدني او او علي الاقل هتقولي اتصرف ازاي
وبمجرد ما جتني الفكرة
قومت بسرعة من مكاني في الجنينة
وكنت ناوية اتوجه لبيت خالتي الدكتورة
لكن...قبل ما اخرج من حديقة المنزل
اتفاجئت با اتنين من الرجال بيوقفوني
وواحد فيهم سألني
وقالي...انتي ساكنة هنا في البرج ده؟
قلت ..ايوه
قال...معلش مش هينفع تخرجي من هنا قبل ما نلاقي شنطة الفلوس
قلت...فلوس اية؟
قال...شنطة عابد بية ضاعت...
وفيها مبلغ كبير من الدولارات واوراق مهمة
قلت ..يطلع مين عابد بية ده؟
قال...عابد بيه ده يبقي
صاحب البرج الي حضرتك واقفة في الجنينة بتاعتة
دلوقتي
والبية كان هنا في الجنينة بيعمل مكالمة
ومعاه الشنطة الي فيها الفلوس...
وللاسف خرج ونسي الشنطة في الجنينة
فا هزيت كتافي
وقلت..طب وانا مالي بشنطة البية بتاعك ؟
فا رد عليا ..الرجل
بقلة زوق
وقالي....
.طب معلش بقي مش هينفع تخرجي من الجنينة قبل ما عابد بية يجي
في اللحظة دي
انا كنت في قمة الغضب
وكان فيا الي مكفيني
فا انفجرت في الرجل
وقلتلة...شنطة مين يا ابو شنطة
انت اتهبلت يا جدع انت ولا
هبت منك ؟
انا هخرج من الجنينة
ولو اعترضت طريقي قسما عظما
لا امسح بكرامتك الارض
انت والزفت الي مشغلك
ولما لقيت الراجل خاف من صوتي وتراجع للخلف
تعمدت اني اعلي في الاداء
ونزلت قلعت الي في رجلي وكنت رايحةاضربة بال.....
لولا اني سمعت صوت حنين
بيتسال بحسم
وبيقول...في اية يا بدير
اية الي بيحصل هنا ده
في اللحظة دي
بصيت با اتجاه الصوت
وشوفت ادامي شخص جديد
والشخص ده كان شاب زي القمر
شياكة اية... ووسامة اية
اول ما شوفتة... افتكرت بطل فيلم تايتنك
الي كان اسمة (جاك)
بس الفرق الوحيد
ان الشاب ده كان ملتحي ولابس طاقية من بتاعة الصلاة
يظهر انة متدين
فسالتة بغضب
وقلت...انت مين
انت كمان؟
فا رد الشاب
وقال...انا الزفت الي مشغلة
فا رد بدير
وقال...مفيش حاجة يا عابد بية
قلت...عابد بية ؟
يعني الموضوع كده كبر
بصراحة اول ما شوفتة ...
جاي وبيزعق
افتكرتة جاية يمسخرني علي الي عملتة في رجالتة
فا اتسمرت في مكاني
وانا بفكر ازاي هتخانق مع شخص بالشكل دا
لكن الغريبة...
اني اتفاجئت بالشخص القمر ده
وهو جاي يعتذرلي عن الي رجالتة عملوه معايا
ولقيتة جاي بيلقي عليا التحية بايدة
وبيقولي ..
السلام عليكم
انا عابد الجوهري
جارك هنا في البرج
ساكن في الدور الخامس
وبعتذر عن الي حصل من رجالتي
فا بصتلة بتأمل
وانا بفكر بيني وبين نفسي
وقلت...الدور الخامس ده نفس الدور الي انا ساكنة فيه؟
معقولة الكائن ده ساكن قصادي وانا معرفش؟
وبسرعة فوقت لنفسي
وقلت..جري اية يا ريم
انتي هتاكلي من الرقة المصطنعة دي ولا اية
دا رجل اعمال...
يعني اكيد بيلعب بالبيضة والحجر
واكيد لقي الشنطة الي اتهموني فيها...
ومحرج من الي عملوه رجالتة
معايا
عشان كده خايف لاعملة فضيحة
فا جاي يعتذر
فا اقتربت منه
و سالتة...
قلت..انت لقيت الشنطة؟
قال..لا
قلت..امال بتعتذر لي لية؟
اقصد.....
اقصد ..لية رجالتك مش متربين... وزوق زي حضرتك؟
فا ابتسم عابد
وقالي.. اوعدك انها مش هتتكرر تاني
ومحدش منهم هيدايقك بعد كده
وارجوكي تقبلي الاعتذار
فا هزيت راسي
وقلت...تمام ...
خلاص مش زعلانة
في اللحظة دي
اصدر عابد بية لرجالة امر بالانصراف
وبعدما اخد رجالة وانصرف
فضلت واقفة لوحدي في الجنينة وانا بفكر في جارنا القمر الي طلعلي فجاءة
وفي عز ما كنت سرحانة سمعت
رنين موبيلي
فا بصيت علي رقم المتصل
لقيتها خالتي الدكتورة جهاد
فا رديت وقلت
ايوه يا خالتوا
فا ردت خالتو جهاد
وقالتلي ..تعالي حالا يا حسنة البيت عشان عايزاكي
قلت...حاضر هجيلك حالا
انا اصلا كنت جايالك
وفعلا روحت لخالتي جهاد
وسردتلها كل الي عرفتة من امي
فا طبطبت عليا خالتي
وقالتلي...امك قالتلي انها صارحتك بالحقيقة
وعشان كده انا طلبتك دلوقتي
قلت...خير
قالت...اسمعي يا حسنة البيت
انا مش عايزاكي تشيلي هم اكبر منك
انتي ملكيش ذنب في دا كلة
قلت...ايوه بس احنا هنسيب امي تستمر في قتل ازواجها كده ؟
فا طبطبت خالتي علي ظهري
وقالتلي
انتي بتثقي فيا وفي معالجتي للامور ولا لا ؟
قلت...ايوه طبعا
فا ردت خالتي
وقالت...خلاص..انسي الي الي انتي عرفتية وكانك مسمعتيش حاجة
و سيبيني افكر في حل
وانا مؤكد هوصل لحل يخرجنا من المصيبة دي
قلت...ياريت
وبعدما ودعت خالتي
رجعت لبيتنا
وفضلت اتابع الشقة الي قصادنا...با اهتمام
الصبح اتابع الباب الي قصادنا
من خلال العين السحرية
وهو بيتفتح وبيخرج منة عابد لشغلة
وباليل...اتابع البلكونة الي قصادنا عشان اشوف عابد وهو واقف فيها
وكان حالي زي الي داخل علي حب من طرف واحد
وفضلت علي الحال ده كده فترة
لغاية ما امي شافتني في مره وانا ببص من العين السحرية
وسالتني
مين الي ساكن ادامنا ده؟
قلت ..ده واحد اسمة عابد
وبيشتغل رجل اعمال
قالت...عرفتي اسمة منين؟
قلت...مفيش دا حصل بينا سؤ تفاهم
قبل كده ...وسردتلها الي حصل
وبعدها
اقسمتلها بان مفيش بيني وبينة اي حاجة
فا ابتسمت امي وطبطبت عليا
وقالتلي
منا عارفة طبعا ان مفيش بينكم حاجة
هو معقولة شاب بالمركز ده
هيبص لحسنة البيت
بعدما سمعت كلامها الي وجعني
سالتها بغضب
وقلت ...يعني اية؟
قالت...
يعني استحالة شاب زي جارنا
يبص لبت عانس سودة ومقشفة زيك
قلت...حرام عليكي بقي
انا مش مقشفة
انتي واخواتك الي كسرتوا ثقتي بنفسي
لانكم ديما بتتنمروا عليا بسبب لوني
لكن انا مش دميمة ولا وحشة زي ما انتوا بتقولوا
فا ضحكت امي
وقالت بسخرية
يا بت دا احنا مسمينك حسنة البيت
لانك س&ودة زي الحسنة الي في الجسم
وتركتني امي ومشيت
بعدما دمرت حتي الحلم الي كنت بحلمة بيني وبين نفسي
لكن..ده ممنعش اني استمر في حلمي
باني اعيش احساس الحب
حتي لو كان الحب من طرف واحد
وفضلت اتابع عابد من بعيد با اهتمام زي منا
وفي يوم
وانا بتابع عابد
عشان احظي برؤيتة وهو راجع من شغلة اخر النهار
من خلال العين السحرية كا العادة
استغربت انه متوجهش لشقتة
واتفاجئت انه جاي ناحية شقتنا ومعاه ورد في ايده
وبعد لحظات
لقيتة بيدوس علي الجرس بتاعنا
ايوه انا سمعت الجرس بالفعل
يعني مش بحلم
فا استجمعت شجاعتي وفتحت الباب
ووقفت امامة وانا ببصلة بشوق الدنيا كلها
وقبل ما اسالة
واقولة عايز اية؟
لقيتة بيطلب مني حاجة لا يمكن تتوقعوها ......؟
عارفين عابد كان جاي لية؟
لو عايز باقي احداث الرواية
صلي علي رسول الله
وطبعا مش هننسي نضع عشر ملصقات مع متابعة صفحتي الشخصية
مع تحياتي
الكاتبة
حنان حسن
اللهم صل وسلم على نبينا محمد وعلى آله وصحبه أجمعين
ردحذفاللهم صل وسلم وبارك على سيدنا محمد وعلى آله وصحبه أجمعين
ردحذفاللهم صلي وسلم وبارك على سيدنا محمد وعلى آله وصحبه أجمعين
ردحذفاللهم صل وسلم وبارك على سيدنا محمد وعلى اله وصحبه اجمعين
ردحذفعابد جاي يتجوز أمها
ردحذفاللهم صل وسلم وبارك على سيدنا محمد وعلى اهله وصحبه اجمعين
ردحذفاللهم صلي علي سيدنا محمد
ردحذفاللهم صل وسلم وبارك على سيدنا محمد وعلى آله وصحبه وسلم تسليما كثيرا
ردحذفاللهم ما صلي على سيدنا محمد وعلى اله وصحبه اجمعين يارب العالمين
ردحذف