رغبة ملعونة الجزء الخامس للكاتبة...حنان حسن بعدما سالني شهاب بيه ان كنت موافقة اشتغل عندهم ولا لا؟ وقفت ابص لخالتي الي كانت بت...
الجزء الخامس
للكاتبة...حنان حسن
بعدما سالني شهاب بيه
ان كنت موافقة اشتغل عندهم ولا لا؟
وقفت ابص لخالتي
الي كانت بتعيط وهي مغلوبة علي امرها
ورديت
وقلتلة...
ايوه موافقة
فا رد شهاب بية
وقالي...
خلاص...
روحي هاتي حاجتك من عند الباشمهندس
وفهمية ان دي رغبتك انتي
عشان ميزعلش مننا
ويقول اننا اخدنا منه الشغالة الي عنده
قلت..
..حاضر
وفعلا روحت علي شقة الباشمهندس
ودخلت عليه
وقلتلة ...
بعد اذنك يا باشمهندس انا هاخد هدومي وامشي
استغرب الباشمهندس من قراري المفاجئ
وقالي...
ايه الي بتقولية ده؟
ولية عايزة تمشي يا صابرين؟
هو انا زعلتك في حاجة؟
قلت...لا خالص
بالعكس
ده حضرتك راجل محترم
وكنت كريم معايا جدا
وانا مشوفتش منك غير كل خير
الامر ومافية بس
اني سمعت الناس بيتكلموا
علي وجودي مع حضرتك
وحضرتك يعني متاخذنيش (عازب)
فا قلت... ابعد عن ظنون الناس
واشتغل في حتة تانية
وعموما انا هكون في نفس العمارة
ولو حضرتك احتجت اي حاجة انا في خدمتك
بصلي الباشمهندس
وقالي..
بس انا اتعودت عليكي يا صابرين
اقصد يعني...
انا كنت معتمد عليكي هنا في كل حاجة
ازاي عايزة تمشي وتسيبيني؟
لو عايزة فلوس زيادة قولي
لكن متسبنيش
قلت...معلش يا باشمهندس
ريحني ...
المسالة مش مسالة فلوس
وعموما انا ممكن ارجع تاني هنا عند حضرتك بعدين
بس لازم امشي دلوقتي
عشان الناس يبطلوا كلام
وقبل ما الباشمهندس يجادلني
مشيت بسرعة من ادامة
ودخلت جيبت شنطة هدومي
ومن لهوجتي نسيت خالص شنطة الحرامي
المهم..
بعدما روحت علي شقة خالتي
قابلني شهاب بية
وسالني...
قال..خلاص ؟
خليتي طرف من عند الباشمهندس ؟
وفهمتية انك هتشتغلي في مكان تاني؟
قلت...
ايوه ....وجيبت كل حاجتي كمان
وفي اللحظة دي
بص شهاب بية في المكان
وبعدين سالني
قال..امال ابنك فين؟
قلت...ابني مين؟
انا معنديش اولاد
استغرب شهاب بية من ردي
ورجع سالني
قال...امال الواد الي كان معاكي
فين؟
قلت.. ده مش ابني
قال...
امال ابن مين؟
قلت...ابن الباشمهندس
رد شهاب بية
وقال...
ازاي الولد يبقي ابن الباشمهندس
اذا كان الراجل مش متجوز اصلا؟
قلت..
لا... الباشمهندس متجوز
ومراتة معاه في البيت كمان
فا بصلي شهاب بية بزهق
وقالي..
هو انتي مفيش فايدة في الكدب الي في دمك ده؟
يابت ارحمي نفسك ...
وبطلي كدب شوية
قلت...صدقني حضرتك
مراتة كانت في الشقة وانا شوفتها بعنيا
وبالامارة كانت بترضع ابنها ادامي
بصلي شهاب بية
وقالي..
اسكتي يا صابرين ..
وكفاية فشر
قلت...هو ليه حضرتك مش عايز تصدقني؟
قال..
لان الي بتقولية استحالة
يكون حقيقي
لان الباشمهندس قالي..انه متجوزش قبل كده
فا بطلي داء الكدب الي فيكي ده
لو كنتي عايزة تستمري معانا هنا
قلت..حضرتك مش مصدقني
لكن انا مسيري اثبت لحضرتك
صدق كلامي
فا ابتسم شهاب بية
وقالي..
من النهاردة مش هقولك يا صابرين..
انا هسميكي
ابو العربي
واثناء ما كان شهاب بية بيبتسم وهو بيكلمتي...
سمعت صوت بسنت بنت خالتي وهي بتكلمني بغضب
وبتقولي...
انتي هتفضلي واقفة عندك طول الليل
ادخلي يلا جهزي العشاء ليا انا والبية
وبالمرة جهزي الاكل المسلوق بتاع ماما
في اللحظة دي
اخدت بالي ان بسنت عقدت العزم
انها تطفشني بالزوق
يعني عايزة تخليني امشي من البيت
لكن ....
كانت عايزاها تيجي مني انا
المهم...
هزيت راسي
وقلت..حاضر
وبعدما سيبتهم ودخلت علي المطبخ
لقيت بسنت جت ورايا
وهي بتزقني بعنف لداخل المطبخ
وبتقولي...
اسمعي يا بت انتي عشان تبقي فاهمة
من اولها كده...
شغل الخدامين...
وبنات الشوارع الي انتي بتعملية ده
حذار تعملية هنا تاني
وشهاب بية خط احمر
يعني حذار تقفي تتكلمي معاه
وانتي بتتمايصي
ولا ليكي دعوة بية من اساسة
احسن قسما بالله
اخليكي تندمي علي اليوم الي دخلتي فية لبيتي
انتي سامعة ولا لا؟
وفي اللحظة دي
حسيت بقمة المذلة
وداريت دموع عنيا
وقلت..حاضر
ومكتفتش بسنت بنت خالتي بكسرة نفسي ادامها
الا كمان مسكتني من هدومي بقرف
وهي بتقولي..
استني خدي هنا
اية اللبس المحزق الي انتي لبساه ده ؟
من بكرة تدوري في بلاكونة المطبخ
علي جلابية الشغالة الي كانت هنا قبلك
وتلبسيها
وامسحي الهباب الي في وشك ده؟
وسنتك هتبقي سودة
لو شوفتك حاطة اخضر واحمر في وشك تاني
فا هزيت راسي بدون جدال
وقلت...حاضر
وبعدما ما بسنت خلصت تعليماتها
بصتلي باحتقار وخرجت من المطبخ
وانا بمجرد ما بسنت
خرجت
انفجرت بالعياط من شدة القهر الي انا كنت حاسة بيية
ولقيتني بقول لنفسي
ايه الي انا عملتة في نفسي ده؟
يعني بعدما كنت بلاقي حد يعاملني كويس...
ويدفعلي راتب شهري
مقابل تعبي ...وشقايا
رحعت اخدم في بيت خالتي
مجانا
وانا بتهان وبتذل بالشكل ده؟
وفضلت اغسل الخضار بعصبية
لغاية ما اتغرقت بالمية
وكا العادة خوفت علي الحجاب الي من ريحة امي
فا خرجت الحجاب بسرعة من صدري
وبمجرد ما لمستة
لقيت ادامي قادرة
ماسكة حتة خيارة من الطبق
الي قدامي
وبتبصلي بغيظ
وبتقولي...ازيك يا خايبة يا عويلة؟
رديت بكسرة
وقلت..اية الي جابك تاني يا قادرة؟
قالت..
جيت اتشاهد في جمال خيبتك الي ما اتوجدت ولا اتوصفت
قلت..
ابعدي عني وحياة ابوكي
انا مش ناقصاكي يا قادرة
انا الي فيا مكفيني
ردت قادرة بجبروتها المعتاد
وقالتلي..
لا ابعدي انتي بقي شوية
وخليني اربي البت المعرقبة بنت خالتك دي
انتي ازاي اصلا تسمحلها تعاملك بالشكل ده؟
قلت..خلاص يا قادرة انا مش عايزة مشاكل تاني
ردت قادرة
وقالتلي..اتكتمي يا بت
واركني في جنب دلوقتي خالص
قلت..ايوه بس فهميني ناوية تعملي اية؟
انا مش حمل اي قتيل تاني دلوقتي
انا مصدقت لاقيت مكان
استخبي فيه
من المصايب الي حضرتك لبستهالي في البلد
ردت قادرة
وقالتلي...
لا ....المرة دي مفيش قتل
قلت ..امال ناوية علي ايه المره دي ....اتحفيني؟
قالت
ناوية علي كيد النساء
قلت مش فاهمة؟
قالت...انا هفهمك
انا عارفة انك عايزة ترجعي تشتغلي عند الباشمهندس...
وتاخدي مقابل لتعبك وشقاكي
بدل منتي بتخدمي الجزمة الي اسمها بسنت ...مجانا
لكن...في نفس الوقت
مش عايزة تزعلي خالتك
و محرجة تقولي ليها كده
....صح؟
قلت..صح
قالت...خلاص
اعملي زي ما بسنت بتعمل
قلت..اعمل زيها ازاي؟
قالت..بسنت عايزة تطفشك وعشان كدة
بتقرفك في عيشتك فا تزهقي وتمشي
وبكده هتخلص منك بدون ما تزعل امها
لان لما يفيض بيكي وترجعي تشتغلي عند الباشمهندس تاني
خالتك ساعتها هتزعل منك انتي
عشان هتخالفي اوامرها
قلت..
والحل دلوقتي؟
فا ردت قادرة
وقالت...
اننا نقرفها احنا كمان في عيشتها
ونضربها علي نقطة ضعفها
قلت...ازاي؟
قالت..
هنغازل جوزها ونكيدها
وساعتها... هي هتطردك بنفسها ادام خالتك
و انتي ساعتها..
هتبقي ادام خالتك البت الغلبانة .. المقهورة
الي اجبرتها قسوة بسنت بنت خالتها
انها تسيب بيت خالتها..
وترجع لشغلها في بيت الباشمهندس تاني
وهتخلصي بقي من القرف الي انتي فيه ده
قلت...يلهوي
لكن ازاي هغازل شهاب بية
مهو كدة هيفهم
اني انا الي بتصرف التصرفات الزبالة دي؟
وهياخد عني فكرة غلط
ردت قادرة
وقالتلي..
وحياة امك؟
ده علي اساس...
ان شهاب بية فاهم انك داعية اسلامية؟
ده الراجل قالك بنفسة انك
بت شمال
يعني...
ضربوا الاعور علي عينة
قال
خربانة ..خربانة
قلت..تصدقي عندك حق
يا قادرة؟
بس...هعمل كده ازاي؟
انا مقدرش ....
بصتلي قادرة بغيظ تاني
وقالتلي..
عملك اسود يا عويلة
انا مش عايزاكي تعملي حاجة
ابعدي انتي خالص
وكل الي عليكي
تجيبي علبة الفشار بتاعتك
وتقعدي تتفرجي
قلت..بس يا قادرة......؟
ردت قادرة
وقالتلي..
بطلي ام البسبسة
وروحي هاتيلي التريننج الليكرا
...
والمكياج الي في شنطتك ...
وسيبيني الباقي عليا
وفعلا جيبتلها الي هي طلبتة
وفضلت اتابع في صمت
واشوف هي هتعمل ايه ؟
ولقيتها عملت فنجان قهوة مظبوط...
واخدتة ...ودخلت علي شهاب بية في غرفة مكتبة
والغريبة اني
شوفت شهاب بية وهو بيبصلها باعجاب شديد
وهو فاكر انها انا
وسمعتة وهو
بيسالها..
وبيقولها...
انتي عرفتي ازاي يا صابرين
اني بشرب قهوتي مظبوطة؟
فا ردت قادرة
وقالت...
حضرتك كل حاجة فيك مظبوطة
اشمعني القهوة يعني
اكيد قهوتك كمان هتبقي مظبوطة
ابتسم شهاب بية
وهو بيتفحص قادرة بعنية
وقال...عارفة يا صابرين
برغم كدبك وحواراتك الكتير
لكن بيعجبني فيكي ذكائك
فا ضحكت قادرة
ضحكة رقيعة
وقالتلة...
يعني بعد المكياج وكل الهم الي انا عملاة في نفسي دة
وكل الي عاجبك فيا ذكائى؟
طييييب
فا ضحك شهاب بية المرة دي بصوت عالي شوية
وقالها..
يخربيت عقلك يا صابرين
ضحكتيني برغم كل المشاكل الي عندي
فا ردت قادرة
وهي بتبص في عنية بصة جريئة
وقالتلة...
عايزة اقولك حاجة يا شهاب بية
بس والنبي متشخط فيا
رد شهاب بية
قالها...قولي
بصتلة قادرة
وقالت...
انا من اول مرة شوفتك فيها
وانا نفسي اجي اشتغل عند حضرتك
فا اتعجب شهاب بية
وسالها..
اشمعني انا الي كان نفسك
تشتغلي عندي؟
فا ردت قادرة
وقالت..
عشان..
انت راجل محترم...
وشخصيتك قوية..وشامخ زي الجبل
وتقدر علي اي حاجة
واي واحدة زي تتمني انها تشتغل عندك
فا ابتسم شهاب بية
وقالها..
يعني انتي شايفاني زي الجبل؟
ايه التشبية الحلو ده؟
فا ردت قادرة
وقالتلة...
واجمد من الجبل كمان
وهنا دخلت بسنت عليهم وهي بتوجة سؤال لجوزها
وبتقولة..
حلوة القعدة الي انت قاعدها مع الشغالة بتاعتك يا جبل؟
فا رد شهاب بية بغضب
وقالها..
في ايه؟
قالت...
في ان
البت واقفة تتمايص وتدلع عليك
... وتقولك انك جامد وجبل
وبدل ما تضربها قلمين
وتطردهها
قاعد حضرتك وفاشخ ضبتك
وبتتجاوب معاها....
وعاجبك الحوار
وهنا اكتفت قادرة بفك فتيل القنبلة
وانصرفت
بعدما تركتهم ماسكين في بعض
وبدات تمشي بمياصة
عشان تغيظ بسنت
وراحت بعدها علي اوضة خالتي
وفضلت تعيط وتمثل
وتقولها..
بنتك مش طايقاني في بيتها يا خالتي
وعمالة تزل فيا وتتلككلي
فا طبطبت عليها خالتي
وقالتلها...
حقك عليا متزعليش يا صابرين...
مترديش عليها وسيبيها...
وانا هعرف شغلي معاها
وخلصت بسنت خناقتها مع شهاب بية
ودخلت لقت مامتها بتتخانق معاها برضوا
وفضلت قادرة علي النظام ده
وكل شوية تتغزل في شهاب بية...
وتتمايص عليه
وبعدها تروح تشتكي لخالتي من قسوة بسنت
لغاية ما بسنت اتجننت وفاض بيها
وخيرت امها ....وزوجها
ما بين وجودها او وجود صابرين في البيت
ومرة واحدة
لقيت بسنت بترميلي شنطتي بره البيت
فا بصيت لقادرة
وقولتلها
عاجبك الاهانة الي انتي اتسببتيلي فيها دي؟
اتفضلي غوري بقي ومش عايزة اشوف وشك تاني
فا بصتلي قادرة باشمئزاز
وقالتلي..
ده بدل ما تشكريني اني حليتلك المشكلة؟
هقولك ايه منتي عويلة
وسابتني قادرة واختفت
وفي اللحظة دي
اخدت شنطة هدومي
ورجعت لشقة الباشمهندس
عشان اشتغل عندة تاني
بعدما تركت رسالة لخالتي
وكتبت لها فيها
وقلتلها...
انا ميرضنيش ان بنت خالتي تسيب بيتها بسببي
وعشان كده
انا مضطرة ارجع لشغلي تاني
عند الباشمهندس
واطمني يا خالتي
انا مش هقول لاي حد اني ابقي بنت اختك
عشان اعفيكم من الفضايح
ورجعت لشغلي تاني فعلا
في بيت الباشمهندس
الي فرح جدا برجوعي للشغل عنده
لكن.... لما رجعت المرة دي
لاحظت حاجة غريبة
وهي ...
ان الولد الصغير مش موجود مع الباشمهندس
وقلت لنفسي
يمكن يكون سايبة مع امة ؟
عشان يشوف شغلة
وتجاهلت الموضوع
ومسالتش عن الولد
وقلت كمان شوية هيدخل يجيبة من جوه
كا العادة
لكن الي حصل
ان الباشمهندس خرج لشغلة
بدون ما يكلمني عن ابنة خالص
ويادوب طلب كام صنف
اعملهملة علي العشاء
واستغربت من الحكاية دي
لكن قولت يمكن تكون زوجتة ماسكة في ابنها جوه
المهم..
بعدما الباشمهندس خرج
فضولي اخدني
وقلت لنفسي
لازم اعرف الباشمهندس مجبليش الواد ليه؟
بس قلت...
لازم اتاكد انة خرج من العمارة
الاول
وبعدين ابقي ادخل الاوضة المقفولة
فا روحت ابص عليه من الشباك
عشان اتاكد انه مشي بعربيتة
وبعدها ابقي اروح الاوضة المقفولة
واشوف الحكاية اية؟
وفعلا شوفتة اخد عربيتة ومشي
لكن ...قبل ما ادخل من الشباك
شوفت عربية شهاب بية
وكان جاي بعربيتة وبيركنها
تحت العمارة
فا قررت اني اثبت لشهاب بية
بالدليل القاطع
علي وجود الولد ...وامة
عشان يتاكد
اني مكنتش بكدب عليه
وان الولد مش ابني
وفضلت واقفة علي باب الشقة
وانا بقول لنفسي
النهاردة هثبتلك انك كنت ظالمني يا شهاب بية
عشان متبقاش تقولي بعد كده
انتي بنت شمال
وعندي ولد من الحرام ...
ولا انا كدابة كمان
المهم...
فضلت واقفة
واول ما شوفت شهاب بية
طلعت اجري عليه
قبل ما يقرب من باب شقتة
واخدتة من ايده من سكات
ودخلتة لشقة الباشمهندس
فا لقيتة بيقولي..
عايزة اية يا مجنونة؟
قلت...متخفش انا هنا لوحدي...
والباشمهندس خرج
قالي..عارف منا شوفتة خارج بعربيتة من شوية
في اللحظة دي
مسكتة من ايدة
وقلتلة...
تعالي هوريلك حاجة
فا رد شهاب بية
وقالي..
اتلمي واعقلي
وفهمت ساعتها انه فهمني غلط خالص
لكن قلت
دلوقتي لما يشوف مراة الباشمهندس... وابنة
هيعرف انه ظالمني..
وهصلح الصورة الزفت
الي اخدها عني
من اول مره شافني فيها
وبدون ما اتكلم ولا ابرر
بسرعة اخدتة علي الاوضة المقفولة
وفتحتها بالمفتاح الاحتياطي
وقلتلة ....
تعالي قرب عشان تشوف انا عايزة اوريلك اية
وزقيت الباب
وبمجرد ما الباب اتفتح
انا اتصدمت
لان مكنش في اي اثر
لوجود زوجة الباشمهندس.... وابنها
حتي العامود الي كانت مربوطة فيه مكنش موجود
وفضلت واقفة مسهمة
ومش عارفة اقول ايه لشهاب بية
الي كان واقف يبصلي
ومنتظر يعرف
انا جايباة لغاية هنا ليه؟
وفي اللحظة دي
هرشت في راسي
وقلتلة...
اظن دلوقتي لو حلفتلك علي مصحف
ان هنا كان في عمود
ومراة الباشمهندس مربوطة فية
مش هتصدقني؟
فا رد شهاب بية
وسالني
وقالي..عمود اية؟
يعني انتي استدرجتيني من بره لغاية هنا
وجايباني في اوضة مقفولة
عشان توريني العامود؟
قلت..
لا لا عامود اية؟
انا كنت عايزاك تشوف مراة الباشمهندس ... وابنها
اصل الحكاية وما فيها ان........
وقبل ما اكمل كلامي
لقيت شهاب بية
بيوقفني عن اني اكمل كلامي
وقالي...
صابرين انتي معجبة بيا صح؟
قلت...نعم؟
رد شهاب بية
وقالي..
انا فاهم كل حركاتك ...
وتصرفاتك فاضحاكي
وبصراحة... انا كمان معجب بيكي
لكن.... لا مركزي ....ولا اخلاقي تسمحلي
اني اتجاوب معاكي
في الي انتي عايزاه ده
فا اعقلي كده...واستهدي بالله
وسابني شهاب بية وخرج
وانا مش فاهمة
ايه الحظ المنيل الي انا فيه ده
و لية الصدف بتتعمد انها تشوة صورتي عند الراجل ده
ولقيتني بقول لنفسي
يلهوي..ياني؟
الراجل فهم اني بخطفة عشان اتحرش بيه
في الاوضة المقفولة
لا والمصيبة السودة
ان هو... الي مرضيش كمان
طبعا مهو لازم يفهم كده
ببركاتك يا ست قادرة
وفضلت اللوم واعتب علي نفسي
اني سمحت لقادرة بالتصرفات
الهبلة
الي عملتها مع شهاب بية
و الي كان مدايقني اكتر
هو اختفاء الست مراة الباشمهندس وابنها
وفضلت اسال نفسي
ياتري هما راحوا فين؟
وفضلت اهري وانكت
في نفسي
لغاية ما الباشمهندس رجع من بره
واول ما رجع
سالتة بدون اي مقدمات
وقلت...هو فين هاني ابن حضرتك؟
فا بصلي الباشمهندس باستغراب
وسالني..
وقالي
ابني؟
ابني مين؟
انا معنديش ولاد
فا بصيتلة اوي
وبعدين قلتلة...
حضرتك بتقول اية؟
انا بتكلم عن هاني ابن حضرتك
الي انا كنت بعتني بيه
وكان معايا طول الفترة الي فاتت
فا بصلي الباشمهندس
بدهشة
وقالي..
في ايه يا صابرين مالك؟
انا عمري ما خلفت ولا متجوز من الاساس
في اللحظة دي
فهمت ان في حاجة حصلت
و اتسببت ان الباشمهندس يكدب
ويحاول يشككني في نفسي
لكن الي كان محيرني
ان كلامة كان مشابة لكلام شهاب بيه
وهو كمان قالي ان الباشمهندس
مش متجوز
ومش مخلف
وفضلت واقفة حاسة اني افكاري مشوشة
ودماغي هتضرب
وفي اللحظة دي
افتكرت البواب
لانه الشاهد الوحيد الي قالي قبل كده ان الباش مهندس عنده طفل صغير
فا اتحججت باني هنزل اشتري حاجة من السوبر ماركت
الي تحت البيت
ونزلت قابلت البواب
وسالتة
قلت..
هو انا مش اول ما جيت هنا
انتي قولتلي...
ان الباشمهندس عنده ولد صغير؟
فا رد البواب
وقالي..
هو انا فاكر انا اكلت ايه امبارح؟
لا طبعا مش فاكر حاجة
قلت...انا هفكرك
بالامارة انت كنت بتشتري له البامبرز كل يوم
بصلي البواب باستغراب
وقالي...
انا فعلا كنت بشتري بامبرز كل يوم
بس مش للباشمهندس
انا كنت بشتري البامبرز
للسكان الي في العمارة الي عندهم عيال صغيرة
قلت..ازاي ده ؟
يعني انت عايز تفهمني
انك مشوفتش هاني ابن الباشمهندس ابدا؟
رد البواب
وقالي...لا طبعا
الباشمهندس راجل عازب
ومش متجوز
يبقي ازاي هيخلف ولد؟
فا وقفت اكلم نفسي
واقول....الباشمهندس معندوش ولاد ولا متجوز؟
وشهاب بيه قالي كده برضوا
امال مين الست الي كانت في الاوضة المقفولة؟
وراح فين الطفل الي كان معايا الفترة الي فاتت دي كلها؟
وازاي الباشمهندس...بينكر انه عنده طفل صغير؟
امال مين الي شغلني دادة للولد؟
معقولة الباشمهندس الطيب ده يطلع نصاب؟
وفي اللحظة دي
افتكرت الراجل المشوة
الي حاول يتحرش بيا
لما كنت نايمة ...واختفي فجاءة
ولقيتني اتفزعت
لاني بدات اشك في حاجة تانية خالص
اصعب من النصب بكتير
عارفين شكيت في اية......؟؟؟
لو عايز باقي احداث الرواية
صلي علي رسول الله
وطبعا مش هننسي نضع عشر ملصقات مع متابعة صفحتي الشخصية
مع تحياتي
الكاتبة
حنان حسن
كمممممممممممملي بالله عليكي
ردحذفاللهم صلى وسلم وبارك وانعم على سيدنا محمد صلى الله عليه وسلم
ردحذفايه الجمال ده وايه التشويق والإثارة ده❤️❤️❤️❤️❤️❤️❤️ الروايه جميله جدا تسلم الانامل
ردحذفجميله اوى كملى
ردحذفصلي الله علي محمد
ردحذفصلي الله عليه وسلم اكتر من تحفة كملي
ردحذفاللهم صل وسلم على نبينا محمد وعلى آله وصحبه أجمعين
ردحذفاللهم صل وسلم وبارك على سيدنا محمد وعلى اله وصحبه اجمعين
ردحذفعليه افضل الصلاة والسلام
ردحذفروعة بجد والله
ردحذفقمة الإثارة كملي
ردحذف🤔🤔🤔🤔🤔🤔
ردحذف💕💕💕💕💕💕💕
ردحذف🌺🌺🌺🌺🌺💕💕💕
ردحذف🌹🌹🌹🌸🌸🌸🌸🌸
ردحذف👨⚖️👨⚖️👩🎨👩🎨👩🎨🎉🎉🎉
ردحذف💜💜💜💜💜💜💜💜
ردحذف👍👍🌞🌞🌞👍🌙🌙
ردحذفرووووعة
ردحذفروووعه
ردحذفجميله جدا
ردحذف