رواية شبة أنثى الجزء الرابع - للكاتبة حنان حسن - ستجد الرواية كاملة على المدونة - قراءة ممتعة. قصص,روايات,رواية,قصة,حنان حسن
رواية شبة أنثى الجزء الرابع
للكاتبة/حنان حسن
بعدما زيدان طرد فريدة والقطط بتاعتها من الاوضة...
ولبسني في ايدي خاتم
....
وقالي... اول ما تحسي انك محتاجة للحماية
دوسي علي الخاتم...
وطلب مني انام وانسي كل الي حصل
وطبعا انا لما صحيت الصبح
قلت لنفسي
ان كل الي حصل امبارح ده ..
كان من تاثير شوية العصير
الي شربتهم
وقررت اروح اشتكي للحاجة ام فريدة
من الست نسمة
للكاتبة حنان حسن
لكن قلت ادخل اغسل وشي في الاول
و لما دخلت الحمام ومديت ايدي تحت المية
لقيت الخاتم في ايدي فعلا...
فا قلت...يا سنة يا سوخة يا ولاد؟
ايه ده؟
ده الخاتم في ايدي بجد؟
يعني الي انا كنت فيه امبارح
كمان كان بجد؟
ايه ده؟؟؟
معني كده ان زيدان بيه دخل اوضتي بليل
وانا نايمة ؟
وانقذني... لما شاف فريدة داخلة عندي بتخوفني بالقطط بتاعتها
وفضلت افتكر الي حصل بالليل
ولقيتني بقول...
ايوه فعلا...
دا حتي قالي...
لو احتاجتي اي حاجة ادعكي الخاتم
وافتكرت... بالظبط زي ما في حكايات مصباح علاء الدين
لما العفريت طلب من علاء الدين وقالة كل ما تحتاجني
( ادعك) المصباح
انا بقي زيدان قالي كل ما تحتاجيني ادعكي الخاتم
يا حلاوة يا ولاد ...
ولقيتني بقول لنفسي
والله وبقالك حماية يا نعمة؟
وقلت...لا
انا لازم اشكر زيدان بية في اول فرصة
علي كل الي عملة معايا امبارح
للكاتبة حنان حسن
ولما خرجت من الحمام
روحت علي المطبخ
ولقيت الحاجة ام فريدة
بتقولي....
كل ده نوم يا نعمة؟
نموسيتك كحلي يا ختي
تعالي بسرعة جهزي الفطار لزيدان بيه
قلت..اعمل حساب الست فريدة والست نسمة معاه في الفطار؟
قالت...لا
ستك نسمة وستك فريدة
نزلوا وسط البلد يشتروا شوية حاجات
جهزي الفطار والشاي وودية لزيدان بيه في غرفتة
قلت...حاضر
وبالفعل اخدت الفطار ودخلت الغرفة
عند زيدان بيه
وقلت لنفسي
ان احسن فرصة دلوقتي...
اني اشكرة علي كل الي عملة معايا امبارح
هو بصراحة علي اد ما عينة زايغة... وتدب فيها رصاصة
لكن شهم ...وجدع ولازم اشكرة
وفعلا... اول ما دخلت الاوضة عندة
حطيت الصينية من ايدي ...ووقفت ادامة
وقلت...انا بصراحة مش عارفة اشكرك ازاي يا زيدان بيه ...
علي جدعنتك معايا
بجد انت بطل
بصلي زيدان بيه وبدات عنية الزايغة تلمع
وقالي..دنتا الي بطل
يا بطل
قلت..لا انا بتكلم علي حضرتك والي عملتة معايا
رد زيدان بية
متسائلا
قال..عملت معاكي ايه؟
قلت..يعني ساعة ما انقذتني وخرجتهم من الاوضة
قال..خرجت ايه؟
للكاتبة حنان حسن
قلت.. ساعة ما خرجتها هي و القطط
قال...قطط اية ؟
بصراحة..
لما لقيت زيدان بيه بيدعي انه مش فاكر ...
انا قلت انه خايف لا مراتة تعرف
انه دخل اوضتي امبارح
عشان ينقذني
وعشان كده عامل انه مش فاهم
فقلتلة
يازيدان بيه ...الست نسمة مش هنا
خد راحتك
ابتسم زيدان بيه وهو بيقولي..
اخد راحتي في ايه ؟
انتي عايزة ايه بالظبط يا بنت انتي؟
لما شوفت الانشكاح .... والامل الي دب في زيدان بيه مرة واحده
عرفت انه فهمني غلط
فا قلت اوضح كلامي عشان زيدان بيه بيتحرش علي نفسة من غير حاجة
فقلت.. لا يا بيه افهمني ربنا يسترك
انا عايزة اشكرك مش اكتر
قال ..ايوه تشكريني علي ايه بقي؟
قلت... علي جدعنتك... وشهامتك معايا ساعة ما هي دخلت بالقطط
بصلي زيدان بيه وهو مستغرب من كلامي
وسالني
قال..هي مين؟
قلت...الست فريدة
ورفعت ايدي ادام عينة وقلت ..والخاتم مش فاكر الخاتم ؟
فضل زيدان بيه يبصلي بشك ..
وهو معتقد اني بت هبلة ...او بعاني من مرض عقلي معين
فا بدء يجاريني
قالي ... اه الخاتم الي كان في بطن السمكة؟
قلتلة ..لا الخاتم الي قلتلي ادعكية
قال..انا قلت ادعكية؟
قلتلة ..ايوه والله انت قلتلي كده
قالي..وانتي جاية تشكريني عشان قلتلك ادعكي الخاتم؟
قلت...ايوه طبعا وبدعيلك
من ساعة ما اتاكدت
انك كنت في الاوضة عندي امبارح بليل
وانا نايمة
للكاتبة حنان حسن
وقبل ما زيدان بيه يستوعب كلامي
اتفاجئنا...
بالست نسمة الي كانت بتتصنت علي الباب
داخلة علينا
وهي بتصرخ في وش زيدان بيه
وبتقولة... ايوه طبعا ماهي لازم تدعيلك يا بيه
مش كنت عندها في اوضتها امبارح؟
وفي اللحظة دي
طبعا انا عرفت اني هببت الدنيا
واتسببت لزيدان بية في مصيبة
فا حاولت اخرج زيدان بيه من الورطة الي حطيتة فيها
وافهم الست نسمة الموضوع
فا قلت...والنعمة يا ست نسمة البيه مظلوم
وانتي فهمتي غلط
ردت الست نسمة بعصبية ..
وهي بتقولي....
فهمت غلط ازاي؟
هو مش دخل الاوضة وانتي نايمة ؟
وطلعهم بره ؟وقالك ادعكي الخاتم؟
والخاتم اهو في ايديكي
يبقي مظلوم ازاي
بقي ان شاء الله؟
فا لقيت نفسي لازم انكر كل الي انا قلتة
عشان واضح انها فهمت غلط
فقلت...لا هو مجاش عندي الاوضة
ولا طردها هي والقطط
ولا قالي ادعكي الخاتم
انا لقيت الخاتم في السمكة
رد زيدان بيه بغضب
وهو بيقولي...
خاتم ايه ؟
وسمكة اية يا بنت المجنونة؟
هو انا شوفتك امبارح خالص؟
واتعصب عليا زيدان وقالي..
امشي اطلعي بره
وبالفعل خرجت من الاوضة بسرعة
وانا مستغربة ..
هي الناس دي خلقها كنز كده ليه؟
وعصبيين علي طول كده؟
وروحت علي المطبخ وانا عندي احساس بتانيب الضمير
وفضلت ادعي لزيدان بيه
بان ربنا يفك اسره ويخرجة من الاوضة سليم ...
ويثبتة عند السؤال
المهم وانا قاعدة في المطبخ زعلانة...
دخلت عليا الست فريدة
ولما شافتني مهمومة
سالتني..
مالك يا نعمة؟
قلت...انا مش عارفة ليه الست( نسمة) مش طايقاني
من ساعة ما شافتني هنا عندكم
مع اني معملتش فيها حاجة؟
للكاتبة حنان حسن
ردت فريدة بحسم
قالت..البيت ده بتاعنا انا ...وامي.... واخويا
ونسمة دي ضيفة
ومش من حقها انها تدايقك... ولا تعاملك بطريقة وحشة
عشان كده ...مش عايزاكي تعمليلها اي اعتبار
انتي سامعه يا نعمة؟
قلت...ربنا يسعدك يا ست فريدة
ويجبر بخاطرك
زي ما جبرتي بخاطري
وتركتني ست فريدة
بعد ما بردت ناري
وبعد ما الست فريدة خرجت من المطبخ بشوية
اتفاجئت ..
بصوت زيدان بيه جاي من ورا ضهري
فا التفت بسرعة ...لقيتة زيدان بيه
وكان... بيبتسم
ويقولي..
بتعملي ايه يا نعمة؟
بصيت علي زيدان بيه
كويس
عشان اطمن انة لسة سليم....
وبعد ما اطمنت عليه
فضلت اتاسف له
وانا بقول...معلش يا زيدان بيه
انا عارفة ان الست نسمة مش بتحبني...
وبتعاملني باحتقار
من اول ما دخلت البيت
بس اقسم بالله
لو اعرف ان الست نسمة كانت هتعمل معاك كده
انا لا كنت دخلت عندك الاوضة
ولا شكرتك... ولا اتكلمت معاك من الاساس
وبعد ما خلصت كلامي
لقيت زيدان بية بيبصلي اوي
وكانة بيرسمني
وبعد ما فضل متنح
وهو بيبصلي
لقيتة بيقولي
اسمعي يا نعمة
لو نسمة دي دايقتك تاني
انا عايزك تشوطي فيها ....وتمسحي بكرامتها الارض
ومش عايزها تكون سبب في زعلك
قلت...بصراحة انا كنت زعلانة
لكن الست فريدة الله يصلح حالها مرهمتني
قال..عملت اية؟
قلت..مرهمتني
يعني قالتلي كلمتين كانوا عاملين زي المرهم وشافولي جراح الحيزن
الي انا كنت فيه
ابتسم زيدان بيه
وقالي... عموما
انا مش عايزك تخافي من اي حد
طول منا موجود
وزي ما قولتلك امبارح
لو احتجتي لاي حاجة دوسي علي الخاتم
مرتين هتلاقيني ادامك
علي طول
للكاتبة حنان حسن
بصيتلة باستغراب
وسالتة
قلت..هي الست نسمة نامت؟
قال..بتسالي ليه؟
قلت...عشان حضرتك بتجيب سيرة الخاتم وانت مش خايف
ابتسم زيدان بيه
وسالني؟
قال...انتي العدة بتاعتك هتخلص امتي يا نعمة
قلت..انا معنديش عدة
انا بعمل الشاي هنا علي البوتجاز
قال..بوتجاز ايه؟
انا بكلمك عن العدة بتاعة المطلقة
الي بتتحسب من يوم طلاقها
والعدة دي بتخلي المطلقة تقدر تتجوز تاني
قلت..لامؤخذة يا بية
انا معرفش غير عدة الشاي
الي كنت ديما بجيبها لمراة ابويا
عشان تعمل لابويا الشاي
ابتسم زيدان بيه
وسالني تاني
قال..انتي مبتفكريش تتجوزي تاني يا نعمة؟
ابتسمت وانا بتحسر علي نفسي
وقلت..اتجوز تاني ايه بس يا بيه؟
هو انا كنت لحقت اتجوز اولاني
لما هتجوز تاني؟
انا واحدة متعوسة وبختي منيل
وهيفضل منيل انا عارفة
وفي اللحظة دي
سالني زيدان بيه
سؤال
خلي جسمي يتنفض
قال..ههو لو( انا) اتقدمتلك يا نعمة توافقي
قلت..انت بتتمألس عليا يا بية؟
قال..انا بسالك سؤال
ردي علي سؤالي
للكاتبة حنان حسن
قلت..بصراحة يا بيه
انت تتمناك بنت الباشا
و الي يجيلها عريس زيك
تبقي طاقة القدر اتفتحلها
وبصراحة انت كان ممكن تبقي عريس كامل مكمل
لولا.. انك فيك عيب واحد
وسالني زيدان بيه
قال..ايه هو العيب ده؟
قلت..الست نسمة
قال..يعني لو مكنتش متجوز من نسمة ؟
كنتي هتوافقي لو اتقدمتلك؟
بصيتلة بعد ما سالني السؤال ده
وقلتلة
هو انتوا ليه يا اغنية بتلاقوا متعتكم في التريقة علي العالم الغلابة ؟
قال..هو انا اتريقت عليكي يا نعمة
قلت...اتريق يا بيه زي ما يعجبك
وقل مني براحتك...
يعني هي جت عليك يعني؟
ما دنيا كلها عمالة تقل مني
وفي اللحظة دي
لقيت زيدان بيه
بيحط ايدة علي ايدي
وهو بيقولي..
انتي كنتي فين من زمان يا نعمة؟
طبعا انا اول ما لقيتة حط ايده علي ايدي
اتكسفت جدا
وسحبت ايدي من تحت ايده
وقلت اغير الموضوع
فا اديتلة ظهري
وروحت بسرعة علي البوتجاز
ومليت البراد مية وسالتة
قلت..انا هعمل شاي للجماعة بره اعمل حسابك يا زيدان بية؟
للكاتبة حنان حسن
وانتظرت لما البية يرد لكن مردش
فا التفت عشان
اسالة تاني
...لكن لما بصيت عليه ملقتوش في
المطبخ...
فا روحت علي باب المطبخ
عشان الحقة قبل ما يمشي
واسالة ان كان يشرب شاي...
لكن الي رجعني هو اني قابلت الست فريدة في وشي
وكان واضح انها متدايقة جدا
فسالتها
قلت..في حاجة يا ست فريدة؟
قالت..يظهر ان الزفتة نسمة مش عايزة تجيبها لبر
ولازم اتعامل معاها بنفسي
قلت..ليه؟
قالت..الحيوانة اتخانقت مع زيدان اخويا
والامر اتطور بينهم
وخبطتة بالزهرية وايدة اتجرحت
فا استغربت من كلام الست فريدة
وسالتها؟
قلت...الكلام ده حصل امتي؟
قالت..لسة دلوقتي حالا قبل ما اجيلك
منا جاية دلوقتي
عشان ابعتك ليه بشاش ومطهر للجرح
طبعا انا مصدقتش الكلام الي بتقولة
الست فريدة
لان زيدان بيه
كان لسه معايا في المطبخ حالا
وروحت بنفسي لغرفة زيدان بيه
بحجة اني باخدلهم الشاش والمطهر
عشان اتاكد من كلامها
لكن الي صدمني...
اني لما روحت للغرفة الي فيها زيدان بيه
لقيت الحاجة ام فريدة ....ونسمة... وزيدان بيه قاعدين في محزنة
ولما بصيت علي ايد زيدان بيه
لقيتها فعلا بتشلب دم
فا ..قلت..طيب ازاي ؟
لحق امتي زيدان بيه يتخانق ويتعور؟
ده كان معايا قبل ما الست فريدة تدخل المطبخ علي طول
ولقيت نفسي واقفة مش فاهمة حاجة
هو في ايه يا جماعة؟
هو الي كان بيكلمني حد تاني
غير زيدان بيه
ولا ايه؟
للكاتبة حنان حسن
هما كام زيدان؟ وكام فريدة؟
في ايه يا جدعان؟
وكان لازم افهم ايه الي انا فيه ده؟
وافتكرت كلام زيدان بيه من شوية
واحنا في المطبخ
لما قالي انه هيبقي عندي في لحظة
وادام عيني
بمجرد ما ادعك الخاتم
فا فكرت اتاكد
ان كان في زيدان تاني معانا في البيت؟
ولا هو زيدان واحد؟
واتعمدت اني ادعك الخاتم
وانا واقفة ادام زيدان بيه
عشان اشوف ايه الي هيحصل؟
وفعلا...حطيت ايدي علي الخاتم
ودوست عليه مرتين
و فضلت انتظر الي هيحصل
وفجاءة.........
لو عايز باقي احداث القصة ضع عشر ملصقات مع متابعة صفحتي الشخصية
مع تحياتي
الكاتبة
حنان حسن
لكن لقيت
حلوة ومرعبة قوى المرة دى يا ربت يكون ده معادها الثابت
ردحذفياريت تنزلي جزء تاني النهاردة ربنا يبارك لك
ردحذفجميله
ردحذفياريت كمان جزء الله يكرمك
ردحذفتم
ردحذف