رواية عشقتك رغما عنك الجزء الثاني - للكاتبة حنان حسن - ستجد الرواية كاملة على المدونة - قراءة ممتعة
رجعت من الشغل ..لقيت رغد اختي في حالة فزع ..وعمالة تعيط.. روحت بسرعة عملتلها كوباية ليمون عشان تهدي واخدتها في حضني وقولتلها ..اهدي كده وقوليلي مالك.. ايه الي حصل.. وبعد ما هديت خالص بدات تتكلم
قالت .. شوفت جثة
قلت.. نعم ؟
قالت.. اه والله العظيم يا ريم شوفت جثة
قلت.. لا اهدي بالراحة بقي كده وقوليلي شوفتيها فين وازاي بالظبط
للكاتبة.. حنان حسن
قالت.. انا قضيت اليوم في بيت الشيخ عند زوجتة الصغيرة.. الست ام رحيم..وهي معندهاش غير رحيم ابنها عندة يجي ست سنين كدة..
وام رحيم قالتلي ان الشيخ جايبني في البيت ده بس عشان رحيم
قلت.. كويس اوي كملي
قالت.. فضلت طول النهار الاعب الواد رحيم الصغير ده.. وساعة العصرية .. الست ام كريم حبت تنام لها شوية
فطلبت مني اخد الواد.. وانزل اللعب معاه في الجنينة بتاعة البيت بالكورة..وفعلا اخدت الواد ونزلت تحت وطبعا عشان انا جديدة ع المكان واول يوم ليا عندهم مكنتش عارفة حاجة عن المكان .. ولا بنزل للجنينة منين ولا الادوار الي في البيت بتاعة مين
الواد رحيم.. قالي تعالي انا عارف المكان وسبقني وهو بيلعب الكوره علي تحت ولما وصلنا لتحت وقبل ما نخرج الجنينة الي حوالين البيت.. الواد رحيم طلع يجري و اختفي بالكوره بتاعتة مني فضلت ادور عليه.. وكان في شقة في الدور الارضي وكانت الشبابيك فيها الموتال والزجاج بتاعها كله فاميه اسود مكنش مبين ايه الي جواه .. افتكرت الواد استخبي فيها..
فا فضلت ادور علي شباك اعرف اشوف منه المكان جوه عشان اشوف الواد جوه ولا لا.. واخيرا لقيت شباك.. بشيش خشب ..متوارب ..وبصيت من فتحة الشيش لقيت ثلاثة رجالة واقفين ومنيمين واحد وعمالين يقطعوا فيه ..لقيت نفسي كان هيغمي عليا من المنظر ورجليا مكنتش قادرة تشيلني...وكنت لسه هرقع بالصوت ..بس كتمت نفسي احسن يعرفوا اني شوفتهم فا ياذوني
قلت.. يا نهار اسود وبعدين كملي..
قالت..خرجت بسرعة اجري وانا مرعوبة..لغاية ما اتكعبلت في الواد رحيم الي كان مستخبي مني في الجنينة واخدتة وطلعت فوق للست ام رحيم .. اتحججت باني تعبانه وهروح المستشفي و طلبت منها تاخد الواد عشان انا امشي
وجيت جري من ساعتها علي البيت
سالتها ان كانت الشقة دي تبع الشيخ ابو رحيم الي هي بتشتغل عنده قالت .. معرفش .. بس الشقة دي في الدور الارضي وممكن يكونوا الناس دول ماجرينها من الشيخ.. اصلي بصراحة مشوفتش الشيخ معاهم
للكاتبة.. حنان حسن
طبعا كان لازم اهديها واخرجها من حالة الرعب الي هي فيها دي
للكاتبة.. حنان حسن
قلتلها.. يمكن ده واحد تعبان وبيعملوا ليه عمليه... يا ستي متحطيش في بالك.. المهم فكك بقي من حوار الشغل عند الناس دول ومتروحيش تاني وخلاص
وطلبت منها انها متحكيش الموضوع ده مع اي حد خالص تاني مهما كان هو مين
قالت.. لا طبعا انا مش هروح تاني .. ومش هحكي لحد حاجة..
بصراحة الموضوع قلقني ..لا ومش قلقني بس .. ده رعبني كمان لكن حمدت ربنا ان اختي بخير
تاني يوم الصبح.. لقيت صباح.. اختي بتصحيني وتقولي.. قومي يا هانم عشان تروحي الشغل..
قمت من السرير وانا بستغرب لاصرارها علي اني اروح عند الظابط ده تاني وقلت ..شغل ايه يا ام شغل؟
انا مش رايحة عند ظابط المباحث بتاعك ده تاني خلاص (بح)
قالت صباح.. اخص عليكي يا ريم انتي مش قولتي هتشتغلي عشان تساعديني في جهازي يابت؟
قلت ..ايوه يا صباح ماشي منا هشوف شغل تاني
قالت.. عمرك ما هتلاقي راتب زي الي هتاخدية من ايهاب بيه.. وبعدين يا بت انتي مش وافقتي امبارح انك تجربي عنده اسبوع؟
قلت.. ماشي امري لله نستحمل اسبوع ونشوف ولو اني عارفة النتيجة من
دلوقتي
ضحكت صباح وهي بتقول.. ايوه كده دي اختي الجدعة.. تعالي بقي عشان نفطر
قلت.. تمام..صحي البت رغد عشان تفطر معانا
قالت.. رغد فطرت قبل ما تروح الشغل
قلت.. شغل ايه؟هي رغد راحت الشغل تاني؟
قالت.. اه الست ام رحيم فاتت خدتها النهارده بدري عشان مسافرين المصيف وكانت عايزه اختك معاها هناك
قلت وانا بقفز من السرير انتوا بتستهبلوا؟
ايه خلي البت دي تروح الشغل ده تاني ومسكت الموبيل واتصلت علي رغد.. ولما فتحت عليا الموبيل
قلت.. الو ايوه يا هانم
ايه الي وداكي عند الناس دي تاني يا بت؟
رغد.. معلش بقي يا ريم اقفلي دلوقتي وهبقي اكلمك بعدين عشان احنا في العربية ورايحين المصيف
قلت.. يعني انتوا مش رايحين البيت الي كلمتيني عنه امبارح؟
قالت رغد.. لا لا ياريم ..
طبعا.. كان واضح انها مش عارفه ترد عليا..عشان هي معاها ام رحيم في العربية
للكاتبة.. حنان حسن
قفلت معاها الخط بعد ما طلبت منها تاخد بالها من نفسها
بس ربكم والحق؟انا كنت قلقانه اوي علي اختي.. وبعدها
خرجنا.. انا وصباح وراحت كل واحده فينا علي شغلها..
ولما وصلت عند بيت ..ايهاب بية..رنيت الجرس وعم صلاح مكنش موجود للاسف..وفضلت ارن الجرس كذا مره وبردوا محدش بيرد
لغاية ما في الاخر لقيت ايهاب بية بيفتحلي الباب بنفسة وواضح عليه انه كان نايم..
قلت.. اسفة يا فندم ..انا قولت ان حضرتك خرجت لشغلك وعم صلاح هو الي جوه وهيفتح ..
قال.. لا انا النهارده اجازة وانا بمنع اي حد يجي يوم اجازتي ويرن الجرس عشان ميقلقنيش..
قلت.. طيب لو تحب امشي النهاردة.. عشان اجازة حضرتك انا اروح عادي؟
قال.. لا ادخلي شوفي امل وفطريها
قلت ..تمام..بعد اذن حضرتك ودخلت اشوف امل بنته..ولقيتها لسه نايمة ..فا سيبتها تصحي براحتها عشان احنا لسه بدري
و خرجت اشيك ع الشقة واشوف ايه الي هيتعمل.. وانا بمشي علي اطراف صوابعي.. عشان كنت فاكره ان ايهاب بيه دخل ينام لكن تفاجاءت..وانا داخلة علي المطبخ ان ايهاب بيه صاحي و قاعدة بيدخن في الصالون كمان
ولقيتة بينادي عليا..
قال..انتي يا بنتي
قلت.. ايوه يا فندم؟
قال..اعملي لي قهوة سادة
قلت..لا يا فندم مينفعش قهوة وسجاير ع الصبح كده انا بقول اعمل لحضرتك فطار الاول
قال.. انتي مالك انتي اشرب قهوة ولا سجاير الاول؟
وبعدين فين امل ؟
قلت لسه نايمة
قال..مش قولتلك صحيها تفطر؟
قلت.. حرام يا فندم احنا بدري اوي دلوقتي انا قولت اسيبها تاخد كفايتها من النوم
طبعا انا مش محتاجة اشرحلكم.. رد فعل واحد مش بيطيق حد يصحية يوم اجازتة اصلا فما بالكم .. انا صحيتة بدري كمان
لا ومش اتنيل علي عيني واسكت لحد كده.. لادنا كمان بجود وبحط التاتش بتاعي واقوله مفيش قهوة وسجاير قبل الفطار والي زاد وغطي اني عصيت اومرة ورفضت اصحي البت بنتة
بعيد عنكم لقيتة..اتعصب عليا واتنرفز.. وشوية شوية كان هيولع فيا
..وبالرغم من عصبيتة دي كلها انا مكنش مدايقني الا انه بينده عليا ويقولي(انتي يا بنتي) ليه يعني هو انا مليش اسم؟
انا عارفة انه مش طايقني اصلا من ساعة ما شافني
وبصراحة بقي انا كمان كنت قاصدة .. اخبط كرسي في الكلوب عشان ازعل(ايهاب بية صانع البهجة)و اسيب البيت الكئيب ده.. قبل المدة المحددة..لكن للاسف.. برغم ده كله مطردنيش ..بس اكتفي بانه يحذرني اكررها تاني واعصي اوامره..وسبني ودخل..علي غرفة المكتب بتاعة.. اسيبة؟؟؟
ابدا..دخلت عملت فطار حلو كده وشهي.. وكام قرص طعمية سخنة وشوية فول بليمون طلبت من عم صلاح يطلعهولي وكوباية لبن دافية ع الصبح.. واخدت الفطار وروحتلة علي المكتب.. وخبطت علي الباب..
قال..ادخلي يا بنتي
دخلت وحطيت صينية الاكل علي تربيزة جانبية في المكتب..
قال.. ايه ده؟
قلت.. الفطار
قال.. يا بنتي انتي بتفهمي ازاي؟بقولك مش بفطر الصبح ..
قلت... طيب خلاص يا فندم من هنا ورايح هعمل الي حضرتك تقول عليه.. بس دلوقتي دوق شوية الفول والطعمية السخنة الي ريحتها تجنن دي ..النهاردة بس عشان الفطار اتعمل خلاص ..وسيبت الصينية وخرجت من عنده.. وروحت ع المطبخ اجهز فطار امل.. وبالصدفة لقيت امل صحيت لوحدها.. وجت تجري عليا..
للكاتبة .. حنان حسن
اخدت امل معايا المطبخ وجهزت اكلها وخلتها فطرت وبعد الفطار قعدنا نلعب انا وهي اكتر من ساعة ..وايهاب بيه في غرفة المكتب ..
بعد ما خلصنا فطار ولعب انا وامل خرجتها من المطبخ وطلبت منها تروح غرفتها عشان ابدء انا في عمل الاكل بدري .. واثناء ما احنا معدين علي اوضة المكتب
لقيت ..امل بتقولي انا بحبك يا ريم عشان بتلعبي معايا.. اخدتها في حضني.. وانا بتمني ايهاب بيه يشوفني ويطردني المره دي بقي ونخلص
وفعلا لقيتة فتح الباب مره واحدةو
قال.. انتي يا بنتي...
قلت..في نفسي يا فرج الله المنظر استفذة وهيقولي اطلعي بره اهوه
قلت.. نعم يا فندم
قال.. ادخلي شيلي الصينية الي جوه المكتب دي
قلت .. حاضر ودخلت اخرج الصينية وتفاجأت بان ايهاب بية خلص علي الاكل الي في الصينية كله تقريبا
اخدت الصينية وخرجت.. وانا بتعجب علي داء العند الي بيصاب بيه كثير من البشر
للكاتبة ..حنان حسن
وفضلنا علي الحال ده لمدة اسبوع كامل..كنت بعمل الي بشوفة افضل من غير ما ارجع لراي ايهاب بية وانا بتمني انه يعترض ويجيب اخرة مني ويطردني لكن معرفش ليه كان طويل البال معايا
وبعد مرور اسبوع وانا في شغلي عند ايهاب بية.. جاني تليفون من صباح اختي وهي بتعيط بحرقة وبتقولي
الحقيني يا ريم
قلت وانا مفزوعة من بكائها .. في ايه؟
قالت.. اختك رغد يا ريم واخذت تبكي وهي تقول ..اختك غرقت وماتت في المصيف .....
مع تحياتي
الكاتبة...
حنان حسن
تم
ردحذف